मारवड पोलिसांत अकस्मात मृत्यूची नोंद; आत्महत्येचे कारण अस्पष्ट!
अमळनेर ( प्रतिनिधी ) – अमळनेर तालुक्यातील खर्दे येथे एका ३० वर्षीय तरुणाने राहत्या गावातील बंद असलेल्या घरात साडीच्या साहाय्याने लोखंडी अँगलला गळफास घेऊन आत्महत्या केल्याची धक्कादायक घटना घडली आहे. सतीलाल राजधर भिल (वय ३०, मूळ रा. नरढाणा, ता. शिंदखेडा, जि. धुळे; सध्या रा. खर्दे, ता. अमळनेर) असे मयत तरुणाचे नाव आहे. या घटनेमुळे खर्दे परिसरात हळहळ व्यक्त केली जात असून मारवड पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, २९ ऑगस्ट २०२६ रोजी सकाळी पावणेआठ वाजेच्या सुमारास मयताच्या नातेवाइकांना काशीनाथ नाना भिल याने फोन करून सतीलाल याने फुलसिंग पोपट भिल यांच्या बंद असलेल्या घरात गळफास घेतल्याची माहिती दिली. माहिती मिळताच नातेवाईक व ग्रामस्थांनी तात्काळ घटनास्थळी धाव घेऊन सतीलाल याला खाली उतरवले. उपचारासाठी त्याला तातडीने खासगी वाहनाने अमळनेर येथील ग्रामीण रुग्णालयात दाखल करण्यात आले, मात्र वैद्यकीय अधिकाऱ्यांनी तपासणीअंती त्याला मृत घोषित केले. या प्रकरणी मारवड पोलीस ठाण्यात अकस्मात मृत्यू नोंद क्रमांक २७/२०२६ (बी.एन.एस.एस. कलम १९४ प्रमाणे) दाखल करण्यात आला आहे. मारवड पोलीस ठाण्याचे सहाय्यक पोलीस निरीक्षक साजिद मन्सुरी यांच्या मार्गदर्शनाखाली पोलीस हेड कॉन्स्टेबल एस. ए. पाटील (बॅच क्र. १६०५) या घटनेचा पुढील तपास करत आहेत.
