अज्ञात चोरट्याविरुद्ध गुन्हा दाखल
जळगाव येथील चेतन सर्वानंद राजपाल (वय ४८, व्यवसाय व्यापार, रा. ४९ कंवर नगर, सिंधी कॉलनी, जळगाव) यांनी आपली मारुती सुझुकी ओम्नी कार (क्र. एमएच-०४-डीजे-५४६२) २५ ऑगस्ट रोजी रात्री सुमारे १० वाजता आकाशवाणी चौक ते इच्छादेवी चौकादरम्यान तापी पाटबंधारे कार्यालयाच्या मागील महामार्गालगत उभी केली होती.
२७ ऑगस्ट रोजी दुपारी १ वाजेपर्यंतच्या कालावधीत अज्ञात चोरट्याने ही कार चोरून नेली. कारमध्ये विक्रीसाठी ठेवलेले चष्मे, बेल्ट, टोप्या, हेडफोन, मोबाईल चार्जर आदी कटलरी साहित्यही चोरट्याने लंपास केले.
चोरीस गेलेल्या मारुती सुझुकी ओम्नी कारची अंदाजे किंमत ५० हजार रुपये, तर कारमधील विविध साहित्याची अंदाजे किंमत २५ हजार रुपये आहे. अशाप्रकारे एकूण ७५ हजार रुपयांचा मुद्देमाल चोरीला गेला.
घटनेची माहिती मिळाल्यानंतर चेतन राजपाल यांनी जिल्हापेठ पोलीस ठाण्यात धाव घेत तक्रार दाखल केली. त्यांच्या फिर्यादीवरून अज्ञात चोरट्याविरुद्ध गुन्हा क्रमांक २७२/२०२६, भारतीय न्याय संहितेच्या कलम ३०३(२) अन्वये चोरीचा गुन्हा दाखल करण्यात आला आहे.
पोलिसांनी चोरीस गेलेल्या कारचा शोध सुरू केला असून, परिसरातील सीसीटीव्ही फुटेज आणि अन्य तांत्रिक माहितीच्या आधारे तपास केला जात आहे. या प्रकरणाचा पुढील तपास पोहेकॉ. संतोष सोनवणे करीत आहेत.
