जळगाव शहरातील घटना
जळगाव (प्रतिनिधी) :- शहरातील ३७ वर्षीय तरुणाचा अकस्मात मृत्यू झाल्याची घटना शनिवार दि.२५ नोव्हेंबर रोजी सकाळी उघडकीस आली आहे. आंघोळ करीत असताना अचानक बेशुद्ध झाला. त्यानंतर शासकीय रुग्णालयात त्याला मयत घोषित करण्यात आले आहे. यामुळे शहरात हळहळ व्यक्त करण्यात येत आहे.
निलेश कमलाकर सोनवणे (वय ३७, रा. कांचन नगर) असे मयत तरुणाचे नाव आहे. तो कांचन नगरात आई, भाऊ, पत्नी, एक मुलगा व एक मुलगी यांच्यासह वास्तव्याला आहे. कानळदा रस्त्यावरील एका मोठ्या कापड दुकानात काम करून तो कुटुंबाचा उदरनिर्वाह करीत होता. शनिवारी २५ नोव्हेंबर रोजी सकाळी ८ वाजेच्या सुमारास तो आंघोळ करण्यास गेला असता अचानक बेशुद्ध पडला कुटुंबीयांच्या लक्षात येताच त्यांनी त्याला शासकीय वैद्यकीय महाविद्यालय व रुग्णालयात उपचारासाठी दाखल केले.
त्या ठिकाणी वैद्यकीय अधिकारी डॉ. नम्रता अच्छा यांनी त्यास तपासून मयत घोषित केले. दरम्यान शनिपेठ पोलीस स्टेशनला माहिती मिळताच त्यांनी घटनास्थळी धाव घेतली. घटनेची माहिती जाणून घेतली. या प्रकरणी शनिपेठ पोलीस स्टेशनला अकस्मात मृत्यूची नोंद करण्यात आली आहे. निलेश सोनवणेच्या अकाली जाण्यामुळे त्याच्या कुटुंबीयांना मोठा धक्का बसला असून रुग्णालयात त्यांनी आक्रोश केला होता. कांचन नगरामध्ये तरुणाच्या मृत्यूमुळे हळहळ व्यक्त करण्यात येत आहे.
