पाचोरा मतदारसंघातून सुमित पाटील यांची बिनविरोध निवड निश्चित होण्याचा मार्ग मोकळा!
भाजपचे उमेदवार सतीश शिंदे यांची माघार; आमदार किशोर पाटील यांचे सुपुत्र सुमित पाटील यांना बिनविरोध निवडीची संधी
जळगाव (प्रतिनिधी) : जळगाव जिल्हा मध्यवर्ती सहकारी बँकेच्या निवडणुकीत आणखी एक महत्त्वाची राजकीय घडामोड समोर आली आहे. पाचोरा विकास मतदारसंघातून शिवसेना (शिंदे गट) चे आमदार किशोर पाटील यांचे सुपुत्र सुमित पाटील यांच्या बिनविरोध निवडीचा मार्ग मोकळा झाला आहे. या मतदारसंघातून सुमित पाटील यांनी उमेदवारी अर्ज दाखल केला होता. त्यांच्या विरोधात भारतीय जनता पक्षाचे उमेदवार सतीश परशराम शिंदे निवडणुकीच्या रिंगणात होते. मात्र, उमेदवारी अर्ज माघारीच्या प्रक्रियेदरम्यान सतीश शिंदे यांनी आपला उमेदवारी अर्ज मागे घेतला आहे. त्यामुळे पाचोरा विकास मतदारसंघात आता सुमित पाटील यांच्याविरोधात अन्य कोणताही उमेदवार शिल्लक राहिलेला नाही. परिणामी, त्यांच्या बिनविरोध निवडीची प्रक्रिया पूर्ण होण्याचा मार्ग मोकळा झाला आहे.

जिल्हा बँकेच्या निवडणुकीतील या घडामोडीकडे राजकीय वर्तुळाचे लक्ष लागले असून, आमदार किशोर पाटील यांच्या कुटुंबासाठी ही महत्त्वाची राजकीय घडामोड मानली जात आहे.









