जातीवाचक शिवीगाळ करत दुकानात तोडफोड
जामनेर (प्रतिनिधी):- शहरातील श्रीराम मार्केट परिसरातील एका आडत व्यापाऱ्याला गाठून त्यांना जातीवाचक शिवीगाळ करत, धक्काबुक्की करून त्यांच्याकडून एकूण १ लाख ५३ हजार ८०० रुपयांची खंडणी वसूल केल्याचा धक्कादायक प्रकार समोर आला आहे. याप्रकरणी जामनेर पोलीस ठाण्यात योगेश भगवान चौके याच्याविरुद्ध ॲट्रॉसिटीसह खंडणीचा गुन्हा दाखल करण्यात आला आहे.
फिर्यादी अशोक उखडू हिवराळे (वय ६८, रा. जामनेर पुरा) यांचे श्रीराम मार्केट भागात आडत दुकान आहे. ८ एप्रिल ते १० एप्रिल २०२६ या कालावधीत संशयित आरोपी योगेश भगवान चौके (रा. गणेशवाडी, जामनेर) याने फिर्यादी यांना “तुम्ही आमच्या परिसरात येऊन कमाई करतात आणि आम्हाला काहीच देत नाही” असे म्हणून धमकावले. आरोपीने फिर्यादीच्या दुकानात शिरून धक्काबुक्की केली आणि त्यांच्याकडून ८ हजार रुपयांची रोकड जबरदस्तीने घेतली.
त्यानंतर “तुमचे दुकान कायमचे बंद करतो” अशी धमकी देत दुकानातील टीव्ही आणि खुर्च्यांची तोडफोड करून नुकसान केले. इतक्यावरच न थांबता आरोपीने ८०० रुपये ‘गुगल पे’ द्वारे स्वतःच्या खात्यावर ट्रान्सफर करून घेतले आणि दुकानाच्या गल्ल्यातील १ लाख ४५ हजार रुपये जबरदस्तीने काढून घेतले. फिर्यादी अशोक हिवराळे यांच्या तक्रारीवरून जामनेर पोलीस ठाण्यात गुन्हा दाखल करण्यात आला आहे.
या घटनेचा पुढील तपास पाचोरा विभागाचे उपविभागीय पोलीस अधिकारी बापू रोहोम हे स्वतः करत आहेत. या घटनेमुळे जामनेर शहरातील व्यापारी वर्गात भीतीचे वातावरण पसरले आहे.
