बापाच्या रुपातील हैवान! अवघ्या १२ वर्षांच्या चिमुरडीवर जन्मदात्याचा अत्याचार
जामनेर तालुक्यातील धक्कादायक घटना, आरोपीला अटक
प्रतिनिधी जामनेर – बाप आणि लेकीच्या पवित्र नात्याला काळिमा फासणारी अत्यंत संतापजनक घटना जामनेर तालुक्यातील मोहाडी येथे उघडकीस आली आहे. घरात विश्वासाने झोपलेल्या अवघ्या १२ वर्षांच्या चिमुरडीवर तिच्याच जन्मदात्या बापाने अत्याचार केल्याचा अमानुष प्रकार समोर आला आहे. या घटनेने संपूर्ण परिसर सुन्न झाला असून नागरिकांमधून तीव्र संतापाची लाट उसळली आहे.
मिळालेल्या माहितीनुसार, २१ ऑगस्ट रोजी मध्यरात्री १ वाजेच्या सुमारास पीडित मुलगी घरात गाढ झोपलेली असताना आरोपी बाप भास्कर केशव भिल्ल याने तिच्यावर जबरदस्ती करण्याचा प्रयत्न केला. अचानक जाग आलेल्या चिमुरडीने बापाला तीव्र विरोध केला आणि विनवणी केली, मात्र कामवाधं झालेल्या या नराधमाने तिचे काहीही न ऐकता तिच्यावर जबरदस्तीने लैंगिक अत्याचार केला. या धक्कादायक प्रकारानंतर प्रचंड घाबरलेल्या मुलीने आपली आपबीती आईला सांगितली. यावर आईने अत्यंत धैर्याने पाऊल उचलत २३ ऑगस्ट रोजी पहाटे थेट जामनेर पोलीस ठाणे गाठून आरोपी पतीविरुद्ध फिर्याद दिली.
आईच्या फिर्यादीवरून जामनेर पोलीस ठाण्यात आरोपी भास्कर भिल्ल याच्याविरुद्ध भारतीय न्याय संहिता (BNS) कलम ६४, ६५ सह बालकांचे लैंगिक अपराधांपासून संरक्षण म्हणजेच पोक्सो (POCSO) कायद्याच्या विविध कलमान्वये गुन्हा दाखल करण्यात आला आहे. घटनेचे गांभीर्य ओळखून पोलिसांनी तातडीने चक्रे हलवली आणि २३ ऑगस्ट रोजी दुपारी १२ वाजेच्या सुमारास नराधम बापाच्या मुसक्या आवळून त्याला अटक केली. या प्रकरणाचा पुढील सखोल तपास सहाय्यक पोलीस निरीक्षक स्वप्नील शिंदे करत असून, पोटच्या गोळ्याचे रक्षण करणाऱ्या बापानेच हे अमानुष कृत्य केल्यामुळे नराधमाला कठोरात कठोर शिक्षा व्हावी अशी मागणी मोहाडी परिसरातून केली जात आहे.
