जामनेर तालुक्यातील पिंपळगाव कमानी येथील घटना
जामनेर (प्रतिनिधी) : रक्षाबंधन सणासाठी माहेरी आलेल्या विवाहितेचा सर्पदंश झाल्याने मृत्यू झाल्याची दुदैवी घटना शुक्रवारी १६ ऑगस्ट रोजी रात्री १० वाजता पिंपळगाव कमानी येथे घडली आहे. पहूर पोलीस स्टेशनला अकस्मात मृत्यूची नोंद करण्यात आली आहे.
पुजा काशिनाथ पवार (वय २१ रा. गोंदेगाव तांडा ता.जामनेर) असे मयत झालेल्या विवाहितेचे नाव आहे. त्या गोंदेगाव येथे पती, २ वर्षांचा मुलगा यांच्यासह राहत होत्या. सोमवारी दि. १९ ऑगस्ट रोजी रक्षाबंधन असल्याने त्या माहेरी पिंपळगाव कमानी येथे आईवडिलांकडे आल्या होत्या. शुक्रवारी १६ ऑगस्ट रोजी रात्री त्यांना घराच्या परिसरात १० वाजता घरी असतांना हाताला सर्पदंश झाला.
कुटुंबीयांनी तातडीने पूजा पवार यांना पहूर येथील ग्रामीण रूग्णालयात दाखल केले. तेथे तपासून वैद्यकीय अधिकारी डॉ. संदीप पाटील यांनी मयत घोषीत केले. यावेळी कुटुंबीयांनी मन हेलावणारा आक्रोश केला. विवाहितेचे तीन वर्षांपुर्वीच लग्न झाले होते. या घटनेमुळे पिंपळगाव कमानीसह गोंदेगाव येथे शोककळा पसरली आहे. घटनेची पहूर पोलीस स्टेशनला नोंद करण्यात आली आहे.
