३५ लाखांची सुपारी घेणारे पाच शार्प शूटर अटकेत ; चार गावठी कट्टे, नऊ जिवंत काडतुसे, ६२ ग्रॅम एमडी ड्रग्जसह ११ लाख ९९ हजार ९०० रुपयांचा मुद्देमाल जप्त
जळगाव (प्रतिनिधी)- जळगाव पोलीस दलाने धाडसी आणि शिताफीची कारवाई करत जळगाव शहरात संभाव्य गँगवार आणि तिहेरी हत्याकांड घडवून आणण्याचा कट उधळून लावला आहे.
भुसावळ येथील दुहेरी हत्याकांडात फरार असलेले कुख्यात गुन्हेगार बंटी पथरोड आणि शिव पथरोड यांनी भुसावळ येथील मिथुन बारसे, क्रिश बारसे आणि करण यांची हत्या करण्यासाठी ३५ लाख रुपयांची सुपारी दिल्याचे पोलीस तपासात समोर आले आहे. या सुपारीतील पाच लाख रुपये आगाऊ घेतल्याची माहितीही तपासात उघड झाली आहे.
दि. ११ ऑक्टोबर २०२६ रोजी मध्यरात्री जळगाव शहरातील कंजरवाडा परिसरात कार्यक्रमासाठी आलेल्या लक्ष्य व्यक्तींवर हल्ला करून त्यांना जीवे ठार मारणे आणि त्यांच्या अंगावरील सोने लुटण्याचा या आंतरजिल्हा टोळीचा कट होता. मात्र, रामानंद नगर पोलीस ठाण्याच्या गुन्हे शोध पथकाला मिळालेल्या गोपनीय माहितीच्या आधारे पोलिसांनी वेळीच कारवाई करत हा गंभीर कट उधळून लावला.
दि.११ ऑक्टोबरच्या मध्यरात्री पिंप्राळा परिसरातील भवानीमाता मंदिर ते सिल्लेमीलजवळील मोकळ्या जागेत पोलिसांनी सापळा रचला. यावेळी इनोव्हा कार (एमएच १९ एई १३५५) वर छापा टाकून पाच सराईत आरोपींना ताब्यात घेण्यात आले. अटक करण्यात आलेल्या आरोपींमध्ये खुशाल गजानन बोरसे (रा. खडक रोड, भुसावळ), संदीप बबन लोंढे (रा. वाघनगर, जळगाव), राजू उर्फ ओमकार भदरगे (रा. शास्त्रीनगर, ठाणे), अरविंद विजय कांबळे (रा. कासोळा, जि. वाशिम) आणि सोनू महेंद्र जयस्वाल (रा. सातिवली, वसई, जि. पालघर) यांचा समावेश आहे. या आरोपींकडून घटनास्थळी दोन गावठी कट्टे, सात जिवंत काडतुसे, धारदार सुरा, कोयता, मिरची पावडर, दोऱ्या, मास्क, पाच मोबाईल फोन आणि इनोव्हा कार असा एकूण नऊ लाख ७७ हजार ६०० रुपयांचा मुद्देमाल जप्त करण्यात आला.
या प्रकरणी रामानंद नगर पोलीस ठाण्यात गुन्हा दाखल करण्यात आला आहे. प्रकरणाचे गांभीर्य, आरोपींचा सहभाग तसेच घरझडतीत आढळलेली शस्त्रास्त्रे आणि अमली पदार्थ लक्षात घेऊन भारतीय न्याय संहिता (बीएनएस) कलम ३१०(४), ३१०(५), ६१(२), हत्यार कायदा कलम ३/२५ व ४/२५ तसेच एनडीपीएस कायदा कलम ८(क) आणि २२(क) या वाढीव कलमांची नोंद करण्यात आली आहे. या कटाचे मुख्य सूत्रधार असल्याचा आरोप असलेले बंटी पथरोड, शिव पथरोड, अभिषेक गोयर आणि मध्यस्थ रवी होळकर यांचीही आरोपी म्हणून गुन्ह्यात वाढ करण्यात आली आहे.
अटक करण्यात आलेल्या तसेच फरार आरोपींची गुन्हेगारी पार्श्वभूमी गंभीर असल्याचे पोलिसांनी नमूद केले आहे. संबंधित आरोपींविरुद्ध यापूर्वी खून, खुनाचा प्रयत्न, दरोडा, जबरी चोरी, चोरी आणि हत्यार कायद्यांतर्गत विविध गुन्हे दाखल असल्याची माहिती आहे. मुख्य सूत्रधार बंटी पथरोड याच्याविरुद्ध १९, तर शिव पथरोड याच्याविरुद्ध १२ गंभीर गुन्हे दाखल असल्याचे तपासात समोर आले आहे.
जळगाव पोलिसांनी वेळेवर केलेल्या या धडक कारवाईमुळे जळगाव शहर आणि भुसावळ परिसरात संभाव्य गँगवार व तिहेरी हत्याकांड घडवून आणण्याचा कट उघडकीस आला आहे. पोलिसांच्या सतर्कतेमुळे मोठा अनर्थ टळल्याचे चित्र असून, या प्रकरणातील अन्य बाबींचा तपास सुरू आहे.
