शनीपेठ, एलसीबी पोलिसांची संयुक्त कारवाई
यापूर्वी जळगावसह धुळ्यात दरोडा टाकल्याची कबुली
जळगाव (प्रतिनिधी) : जळगाव शहरात सौरभ ज्वेलर्स या ठिकाणी पडलेल्या दरोड्याची उकल पोलिसांनी केली आहे. याप्रकरणी पूर्वी तीन सख्खे भाऊ आणि आता तीन अशा सर्व ६ संशयित आरोपींना जेरबंद करण्यात यश मिळाले आहे. दरोड्याविषयी संशयित आरोपी सोनू सारवान याने कट रचला. त्याच्यावर यापूर्वीच नऊ गुन्हे दाखल असून, तो हद्दपार आहे. कट रचल्यानंतर तो दरोडेखोरांना माहिती देत गेला. तसेच अटक करण्यात आलेल्या रितेश आसेरी हा तीन वर्षांपूर्वी सौरभ ज्वेलर्समध्ये कामाला होता. त्यानेच दुकानातील सर्व माहिती दिली, असे तपासात समोर आले आहे.
संशयित आरोपींमध्ये सोनू सारवान, रितेश संतोष आसेरी, दीपक भक्तराज गोयल यांचा समावेश आहे. त्यांना भुसावळ येथून अटक करण्यात आली आहे. अटक केलेल्या दरोडेखोरांकडून एक लाख २० हजार रुपयांची चांदी तसेच दरोड्यात वापरण्यात आलेल्या तीनही दुचाकी हस्तगत करण्यात आल्या आहेत. या दरोडाप्रकरणात अटकेच्या कारवाईनंतर इतर तीन गुन्हेदेखील उघड झाल्याची माहिती उपविभागीय पोलिस अधिकारी संदीप गावीत यांनी दिली. यामध्ये शनिपेठ पोलिस ठाण्याच्या हद्दीतच बंगाली कारागिराकडे टाकण्यात आलेला दरोडा याच दरोडेखोरांनी टाकला होता तर इतर दोन घरफोड्याही या तपासादरम्यान उघड झाल्या आहेत. याशिवाय धुळे येथे एक कोटी २५ लाख रुपयांच्या दरोड्यातही यांचा समावेश असल्याचे समोर आले आहे.
सराफ बाजारातील भवानी माता मंदिरासमोर महेंद्र कोठारी यांच्या सौरभ ज्वेलर्स या दुकानावर सोमवार, २० मेरोजी पहाटे दरोडा टाकण्यात आला होता. या प्रकरणात पुणे येथून रणजितसिंग जुन्नी याला ताब्यात घेण्यात आले होते. त्याने दिलेल्या माहितीवरून सागरसिंग जुन्नी, झेनसिंग जुन्नी या ३ सख्ख्या भावांना अटक करण्यात आली होती.
कोरोना काळात रितेश हा एका रुग्णालयात कामाला होता. त्यानंतर त्याची सोनू सारवानशी ओळख झाली. तेथून घरफोडी, दरोडा असे सत्र सुरु झाले.अटकेतील सहापैकी चार जणांवर या पूर्वीच वेगवेगळे गुन्हे दाखल आहेत. यात सोनू सारवानवर नऊ गुन्हे, रणजितसिंगवर आठ, सागरसिंग व झेनसिंग याच्यावर प्रत्येकी चार गुन्हे दाखल आहेत.