पोलीस अधीक्षकांची पत्रपरिषदेत माहिती
जळगाव (प्रतिनिधी) : भुसावळ तालुक्यातील मांडवेदिगरनजीक रोखपालाकडची १२ लाखांची रोकड पिस्टलाच्या धाकावर लूटण्यात आली होती. याप्रकरणी दाखल गुन्ह्याची उकल करण्यात भुसावळातील बाजारपेठ, तालुका व जळगाव गुन्हे शाखेला यश आले आहे. या गुन्ह्यात चार संशयित आरोपींचा सहभाग आढळला असून त्यातील दोघे अल्पवयीन असल्याने त्यांना ताब्यात घेण्यात आले. दोन संशयित आरोपींना अटक करण्यात आल्याची माहिती मंगळवारी दि. ९ एप्रिल रोजी पत्रकार परिषदेत पोलीस अधीक्षक डॉ.महेश्वर रेड्डी यांनी दिली.
सागर बबन हुसळे (फेकरी, ता.भुसावळ) व अतुल दीपक खेडकर (लहुजी नगर, जामनेर) अशी अटकेतील संशयित आरोपींची नावे आहेत. त्यांच्या ताब्यातून ५ लाखांचे बोलेरो वाहन व लुटीतील १० लाखांची रोकड जप्त करण्यात आली आहे. तक्रारदार भीमराव लक्ष्मण तायडे (वय ४४, जामनेर) हे जामनेर येथील तेल व्यापार्याकडे नशिराबाद येथे रोखपाल आहेत. दि. ३ रोजी तेल विक्रीतून आलेली ११ लाख ७ हजार ४२ रुपयांची रोकड कापडी पिशवीत टाकून ते मदतनीसासह जामनेरकडे दुचाकीने सुनसगाव, कुर्हे पानाचेमार्गे निघाले होते. बुधवारी सायंकाळी साडेसहा वाजता महादेव माळ ते मांडवा दिगर फाट्यांचे दरम्यान चिंचेच्या झाडाजवळ पाठीमागून आलेल्या काळ्या रंगाच्या दुचाकीवरून त्रिकूटाने पिस्टलाचा धाक दाखवत रोकड असलेली पिशवी लांबवली होती.
पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते, भुसावळ उपविभागीय पोलीस अधिकारी कृष्णांत पिंगळे यांच्या मार्गदर्शनाखाली जळगाव गुन्हे शाखेचे पोलीस निरीक्षक किसनराव नजन पाटील, तालुक्याचे पोलीस निरीक्षक बबन जगताप, सहा.निरीक्षक विशाल पाटील, भुसावळ बाजारपेठ पोलीस स्टेशनचे हवालदार उमाकांत पाटील, हवालदार रमण सुरळकर, कॉन्स्टेबल योगेश माळी, कॉन्स्टेबल प्रशांत परदेशी, भुसावळ तालुका पोलीस स्टेशनचे युनूस मुसा शेख, दीपक जाधव, प्रेमचंद सपकाळे, नाईक कैलास बाविस्कर, नितीन चौधरी, राहुल महाजन, कॉन्स्टेबल उमेश बारी, स्थानिक गुन्हे शाखेचे सहा.निरीक्षक अमोल मोरे, संजय हिवरकर, विजयसिंग पाटील, लक्ष्मण पाटील, कमलाकर बागुल, संदीप पाटील, किशोर राठोड, प्रवीण मांडोळे, नाईक रणजीत जाधव, नाईक श्रीकृष्ण देखमुख, कॉन्स्टेबल प्रमोद ठाकूर आदींच्या पथकाने केली.