जळगाव एमआयडीसी परिसरात पोलीस स्टेशनची धडक कारवाई
जळगाव ( प्रतिनिधी ) – एमआयडीसी परिसरातील हॉटेल सागरमध्ये सुरू असलेल्या कुंटणखान्यावर एमआयडीसी पोलिसांनी छापा टाकला. या ठिकाणाहून सहा महिलांसह एका तरुणाला ताब्यात घेतले. हॉटेल मालक पसार झाला आहे.
पोलिसांनी मॅनेजर कुणाल एकनाथ येरापले (वय २५, रा. नागसेननगर, रामेश्वर कॉलनी) याला अटक केली असून, त्यांच्याविरुद्ध गुन्हा दाखल केला आहे. शहरातील एमआयडीसी पोलीस ठाण्याच्या हद्दीतील हॉटेल सागरमध्ये कुंटणखाना सुरू असल्याची माहिती पोलिस निरीक्षक संदीप पाटील यांना मिळाली. त्यांनी तत्काळ उपनिरीक्षक राहुल तायडे, सहायक फौजदार दत्तात्रय बडगुजर, पो.हे.कॉ. राजेंद्र कांडेलकर, महिला पो.हे.कॉ. सुनंदा तेली, पो. कॉ. इम्रान बेग, पो.कॉ. तुषार गिरासे, राहुल घेटे, छगन तायडे यांचे पथक रवाना केले.
या पथकाने डमी ग्राहक पाठवून हॉटेल सागरवर छापा टाकला. येथून सहा महिलांसह एक तरुण मिळून आल्यानंतर पोलिसांनी त्यांना ताब्यात घेतले. याप्रकरणी हॉटेलमालक सागर सोनवणे व मॅनेजर कुणाल येरापले याच्याविरुद्ध गुन्हा दाखल करण्यात आला.
हॉटेलवर पोलिसांनी छापा टाकून कारवाई केल्याची कुणकुण लागलाच हॉटेलमालक सागर सोनवणे तेथून पसार झाला. पोलिसांनी मॅनेजर कुणाल येरापले याला अटक केली. तसेच देहविक्री करणाऱ्या पीडित महिलांची वैद्यकीय तपासणी करून त्यांची आशादीप वसतिगृहात रवानगी करण्यात आली आहे.
