पालकमंत्री गुलाबराव पाटील यांचा पाठपुरावा
जळगाव (प्रतिनिधी) : मुंबई येथे सध्या सुरु असलेल्या पावसाळी अधिवेशनादरम्यान पुरवणी बजेट अंतर्गत जळगाव ग्रामीण मतदार संघात पाच रस्ते व पुलांच्या बांधकामासाठी १५ कोटी तसेच चांदसर येथील शासकीय आश्रम शाळा – शालेय इमारतीच्या बांधकामासाठी १४ कोटी ५० लक्ष इतका निधी पाणीपुरवठा व स्वच्छता तथा पालकमंत्री गुलाबराव पाटील यांच्या पाठपुराव्याने एकूण २९.५० कोटीचा निधी मंजूर करण्यात आलेला आहे. यात सार्वजनिक बांधकाम विभागाअंतर्गत येणारे प्रमुख जिल्हा मार्ग रस्ते व त्यावरील पुलांच्या विकासाकरिता १५ कोटी निधीचा समावेश आहे.
दळणवळणाची साधने चांगली उपलब्ध असतील तर रोजगार व उद्योग वाढीला चालना मिळते. ही बाब लक्षात घेऊन मतदारसंघात रस्त्यांचे जाळे विणले गेले आहे. रस्ते विकासासाठी व शालेय इमारत बांधकामासाठी विकासास मदत होणार असल्याचे पालकमंत्री गुलाबराव पाटील यांनी सांगितले.
जळगाव तालुक्यातील असोदा ते राष्ट्रीय महामार्ग क्र. ६ – मकरा पार्क ते तरसोद – भादली बु. रस्ता यासह जलनिस्सारणासह सुधारणा करणे ३ कोटी, देव्हारी – धानवड – चिंचोली रस्ता प्रजिमा-१०९ किमी आहे. लहान पुलाचे बांधकाम करणे – ३ कोटी, रिधूर – नांद्रा – चांदसर रस्ता असा ८५ कि.मी लहान पुलाचे बांधकाम करणे – ३ कोटी तर धरणगाव तालुक्यातील, कवठळ – शेरी रस्तामध्ये लहान पुलाचे बांधकाम करणे – ३ कोटी, नांदेड – साळवा रस्ता साळवा गावामध्ये कॉंक्रीट रस्ता बांधकाम करणे ३ कोटी अश्या सार्वजनिक बांधकाम विभागाच्या प्रमुख जिल्हा मार्ग पूल व रस्त्यांसाठी १५ कोटी निधीच्या रस्त्यांना मान्यता मिळाली आहे. चांदसर येथील शासकीय आश्रम शाळा – शालेय इमारतीच्या बांधकामासाठी १४ कोटी ५० लक्ष इतका निधी मंजूर करण्यात आला आहे.
विकास कामांसाठी कटिबद्ध : गुलाबराव पाटील
रस्ते व पूल मजबुत असतील तर वाहने गतीमान होऊन वेळेची बचत होते. चांगले पूल व रस्ते हे फक्त दळण – वळणासाठी नाही तर शेतकऱ्यांचे आयुष्य सुकर करण्यासाठी देखील उपयुक्त आहेत. पुलाच्या कामांमुळे गावं जोडली जावून रस्ते विकासामुळे गावा – गावापर्यंत आरोग्य, शिक्षण व रोजगार पोहचतो. दर्जेदार रस्ते व पूल करण्यासाठी यापूर्वीही जाणीवपूर्वक प्रयत्न केल आहे. रस्ते व पुलांसाठी सुमारे १५ कोटी तर चांदसर शासकीय आश्रम शाळेसाठी १४.५० कोटी निधी मंजुरी मिळाली आहे, अशी प्रतिक्रिया पालकमंत्री गुलाबराव पाटील यांनी दिली आहे.
