30 तारखेला एकनाथराव खडसे यांना चौकशीसाठी पाचारण केले आहे.
जळगाव – भाजपला सोडचिठ्ठी देऊन राष्ट्रवादी काँग्रेसमध्ये दाखल झालेले ज्येष्ठ नेते एकनाथराव खडसे यांना सक्तवसुली संचलनालयाकडून चौकशीसाठी नोटीस पाठवण्यात आल्याचे सुत्रांकडून समजत आहे. ‘ईडी’ने 30 तारखेला एकनाथराव खडसे यांना चौकशीसाठी पाचारण केले आहे. हा राष्ट्रवादी काँग्रेस आणि एकनाथ खडसे यांच्यासाठी मोठा धक्का मानला जात आहे.
मात्र, ‘ईडी’ला नक्की कोणत्या प्रकरणात एकनाथराव खडसे यांची चौकशी करायची आहे, हे अद्याप स्पष्ट होऊ शकलेले नाही. त्यामुळे राजकीय वर्तुळात ‘ईडी’ला एकनाथराव खडसे यांच्याविरुद्ध नक्की कोणते पुरावे मिळाले आहेत, याविषयी तर्कवितर्कांना उधाण आले आहे. तर दुसरीकडे राष्ट्रवादी काँग्रेसच्या नेत्यांकडून यावरुन भाजपला लक्ष्य करण्यात आले आहे. भाजपकडून सूडबुद्धीने ईडीची चौकशी लावण्यात आल्याचा आरोप राष्ट्रवादी काँग्रेसचे नेते अंकुश काकडे आणि अमोल मिटकरी यांनी केला. परंतु, एकनाथराव खडसे भक्कम आहेत, ते भाजपला पुरुन उरतील, असा विश्वासही अमोल मिटकरी यांनी व्यक्त केला.
एकनाथराव खडसे यांनी ऑक्टोबर महिन्यात राष्ट्रवादी काँग्रेसमध्ये प्रवेश केला होता. यानंतर उत्तर महाराष्ट्रात एकनाथराव खडसे यांच्या समर्थकांनी भाजपमध्ये प्रवेश करण्यास सुरुवात केली होती. त्यामुळे जळगावसह उत्तर महाराष्ट्रात भाजपच्या किल्ल्याला खिंडार पडण्यास सुरुवात झाली होती. याशिवाय, एकनाथराव खडसे यांनी भाईचंद हिरांचद रायसोनी (बीएचआर) सहकारी बँकेतील तब्बल ११०० कोटीचा घोटाळा उघड करण्याच्या हालचाली सुरु केल्या आहे.
त्यांनी ईडी लावली तर मी सीडी लावेन, एकनाथराव खडसेंचा इशारा
एकनाथराव खडसे यांनी राष्ट्रवादी काँग्रेसमध्ये प्रवेश करतेवेळीच आपल्यामागे ईडीचा ससेमिरा लागण्याची शक्यता व्यक्त केली होती. मात्र, भाजपने ईडी लावली तर आपण सीडी लावू, असा इशारा एकनाथराव खडसे यांनी दिला होता. मला एकदा जयंत पाटील यांनी विचारलं की तुम्ही राष्ट्रवादीत येणार का? तर मी त्यांना सांगितलं की तुम्ही घेतलं तर येईन. तर त्यावेळी जयंत पाटील म्हणाले, तुम्ही आलात तर ते तुमच्यामागे ईडी लावतील, असे आमचे गमतीत बोलणं सुरु होतं. पण आता सांगतो जर त्यांनी ईडी लावली, तर मी सीडी लावीन, असे खडसे यांनी म्हटले होते.
