जळगाव (प्रतिनिधी) – माजी मंत्री गिरीश महाजन यांच्या विरोधातील पुरावे शोधण्यासाठी आपले मित्र कोचर यांच्या घरी माजी मंत्री एकनाथराव खडसे व पारस ललवाणी यांनी पुणे पोलिसांच्या मदतीने खोट्या सर्च वॉरंटचा वापर केल्याचा गंभीर आरोप राष्ट्रवादीचे नेते प्रफुल्ल लोढा यांनी केला आहे.
आज शुक्रवारी जळगावात घेतलेल्या पत्रकार परिषदेत प्रफुल्ल लोढा यांनी माजी मंत्री गिरीश महाजनांना सोडून एकनाथराव खडसे, पारस ललवाणी व रामेश्वर नाईक यांच्यावर गंभीर आरोप केले. ते म्हणाले की, महाजन व त्यांचे आरोग्य सेवक रामेश्वर नाईक यांच्याबाबतच्या काही व्हिडीओ क्लीप्स आपल्याकडे असल्याचा दावा आधी केला होता. तसेच यामुळे महाजन, नाईक आणि त्यांच्या समर्थकांकडून आपला घातपात होण्याचा धोका असल्याची तक्रार देखील त्यांनी पोलीस प्रशासनाकडे केली आहे.
लोढा यांनी एकनाथराव खडसे व पारस ललवाणी यांच्यावर हल्लाबोल केला. लोढा म्हणाले की, एकनाथराव खडसे व पारस ललवाणी हे खालच्या दर्जाचे राजकारण करणारे लोक आहेत. आपल्याकडे गिरीश महाजन यांच्या विरूध्दचे पुरावे असल्याची माहिती मिळाल्यानंतर या दोघांनी गैरमार्गाचा वापर केला. बीएचआर प्रकरणात आपल्यासह आपले मित्र कोचर यांच्या घराचे सर्च वॉरंट काढण्यात आले. यानंतर पुणे एलसीबीच्या मदतीने त्यांनी आम्हा दोघांच्या घरांची झडती घेऊन काही कागदपत्रे व अन्य बाबी जप्त करून नेल्या असल्या तरी याबाबत त्यांनी कागदोपत्री काहीही माहिती दिलेली नाही. यामुळे यात काही महत्वाचे कागदपत्रे हे खडसे आणि ललवाणी यांच्याकडे गेले असल्याची शक्यता लोढा यांनी व्यक्त केली.
लोढा म्हणाले की, एकनाथराव खडसे यांनी आधीच सीडीबाबतची माहिती ही प्रफुल्ल लोढा यांना विचारा अशी प्रतिक्रिया दिली आहे. यानंतर त्यांनी खूप प्रयत्न करून देखील आपण हे पुरावे त्यांना वा इतरांना सोपविले नाही. तथापि, खडसेंनी आपल्याकडून तीन फोटो घेतले असले तरी इतर पुरावे फक्त आपल्याकडेच असल्याची माहिती त्यांनी दिली.
