धुळे एसीबीची अमळनेर शहरात कारवाई
अमळनेर (प्रतिनिधी) : धुळे लाचलुचपत प्रतिबंधक विभागाच्या पथकाने अमळनेर पोलीस ठाण्यातील दोन पोलीस कर्मचाऱ्यांसह एका खाजगी पानटपरीचालकाला १२ हजार रुपयांची लाच घेताना अटक केली आहे. ही कारवाई मंगळवारी रात्री उशिरा पार पडली.
अटक करण्यात आलेल्या संशयित आरोपींची नावे पोलीस कॉन्स्टेबल अमोल राजेंद्र पाटील (वय ३६) आणि जितेंद्र रमणलाल निकुंभे (वय ३३) अशी आहेत. त्यांच्यासोबतच लाचेची रक्कम स्वीकारणाऱ्या उमेश भटू बारी (वय ४६) या पानटपरीचालकालाही अटक करण्यात आली आहे. तक्रारदार अमळनेर येथील पाचपावली मंदिराजवळ एका टपरीमध्ये अवैधरित्या गॅस रिफिलिंगचा व्यवसाय करतात. दोन्ही पोलीस कर्मचाऱ्यांनी त्यांच्याकडे या व्यवसायासाठी दरमहा १५ हजार रुपयांचा हप्ता मागितला होता. जर ही रक्कम दिली नाही, तर गुन्हा दाखल करण्याची धमकीही त्यांनी दिली होती. या त्रासाला कंटाळून तक्रारदाराने धुळे एसीबीकडे तक्रार दाखल केली.
या तक्रारीची दखल घेत एसीबीचे पथक मंगळवारी अमळनेरमध्ये दाखल झाले. ठरल्याप्रमाणे, लाचेची रक्कम बहादरपूर रोडवरील पाचपावली मंदिराजवळील मिनाबाई ठाकरे शॉपिंग कॉम्प्लेक्समधील स्वराज्य पान दुकानदार उमेश बारी यांच्याकडे देण्यास सांगण्यात आले होते. जशी उमेश बारी यांनी लाच स्वीकारली, तक्रारदाराने पथकाला इशारा केला आणि एसीबीच्या अधिकाऱ्यांनी तात्काळ कारवाई करत आधी पानटपरीचालक आणि त्यानंतर दोन्ही पोलीस कर्मचाऱ्यांना अटक केली.
धुळे एसीबीचे उपअधीक्षक सचिन साळुंखे यांच्या नेतृत्वाखाली पोलीस निरीक्षक पद्मावती कलाल, यशवंत बोरसे, हवालदार राजन कदम, मुकेश अहिरे, प्रवीण मोरे, संतोष पावरा, प्रशांत बागुल, मकरंद पाटील, प्रवीण पाटील, सागर शिर्के, प्रितेश चौधरी, रेश्मा परदेशी, सुधीर मोरे, आणि जगदीश बडगुजर यांच्या पथकाने ही यशस्वी कारवाई केली.
