परवानगी नसताना महाराष्ट्रात खत विक्री; गुजरातच्या कंपनीविरोधात गुन्हा
जळगाव | प्रतिनिधी : महाराष्ट्र राज्यात खत विक्रीची परवानगी नसतानाही गुजरातमधील कंपनीकडून खतांची विक्री करण्यात आल्याचा प्रकार समोर आला आहे. या प्रकरणी एमआयडीसी पोलीस ठाण्यात संबंधित कंपनीचे प्रतिनिधी व जबाबदार व्यक्तींविरोधात गुन्हा दाखल करण्यात आला आहे.
१८ हजार रुपयांची फसवणूक
पोलिसांनी दिलेल्या माहितीनुसार, गुजरातमधील भरुच जिल्ह्यातील पानोली येथील सिडनी फॉर्म्युलेशन अँड केमिकल्स या कंपनीकडून महाराष्ट्रात खत उत्पादन व विक्रीसाठी आवश्यक परवानगी नसतानाही व्यवहार करण्यात आल्याचा आरोप आहे. या माध्यमातून १८ हजार २० रुपयांची रक्कम यूपीआयद्वारे स्वीकारण्यात आल्याचे नमूद करण्यात आले आहे.
M-Form व बिलांबाबतही नियमांचे उल्लंघन
कंपनीने विहित नमुन्यातील M-Form मध्ये खत विक्रीचे बिल दिले नसल्याचे तसेच महाराष्ट्रातील खत विक्री व किरकोळ विक्रीसाठी आवश्यक परवाना नसतानाही विक्री केल्याचा आरोप आहे. कीटकनाशक विक्रीसाठीही आवश्यक नमुन्यात बिल न देता नियमबाह्य व्यवहार करण्यात आल्याचे तक्रारीत नमूद आहे.
WhatsApp, QR कोडद्वारे व्यवहार
कंपनीकडून WhatsApp, QR Code आणि ट्रान्सपोर्टच्या माध्यमातून महाराष्ट्रात नियमबाह्य थेट व्यावसायिक विक्री करण्यात आल्याचे तपासात समोर आल्याचा दावा करण्यात आला आहे. या व्यवहारामुळे शेतकऱ्यांची दिशाभूल व फसवणूक झाल्याचेही तक्रारीत नमूद आहे.
कंपनीच्या जबाबदार व्यक्तीविरोधात गुन्हा
कंपनीचे जबाबदार व्यक्ती विनोद एन. रणपरीया यांनी २० ऑगस्ट रोजी दिलेल्या खुलाशात गुजरात राज्यातील कीटकनाशक उत्पादक परवाना कंपनीकडे असल्याचे नमूद केले. मात्र महाराष्ट्र राज्यातील कीटकनाशक किरकोळ व विक्री परवाना तसेच खत परवाना नसल्याचे खुलाशातून स्पष्ट झाल्याचे तक्रारीत नमूद आहे.
या प्रकरणी खत नियंत्रण आदेश १९८५, अत्यावश्यक वस्तू अधिनियम १९५५, कीटकनाशक अधिनियम १९६८ व संबंधित नियम, तसेच भारतीय न्याय संहिता २०२३ मधील कलम ३१८(४) अंतर्गत गुन्हा दाखल करण्यात आला आहे.
प्रकरणाचा पुढील तपास पोलीस उपनिरीक्षक अशोक काळे करीत आहेत.
