बसस्थानकातून घेतले ताब्यात
चाळीसगाव (प्रतिनिधी) :- शहर पोलीस स्टेशनच्या गुन्हे शोध पथकाने अहमदाबाद, गुजरात येथील खुनाच्या गुन्हयातील शिक्षा भोगत असलेल्या व पॅरोलवर सुटून फरार झालेल्या आरोपीस शिताफीने अटक करून अहमदाबाद पोलिसांच्या ताब्यात दिले आहे.
याबाबत शहर पोलीस ठाण्याचे प्रभारी निरीक्षक किरणकुमार कबाडी यांनी माहिती दिली. दि. ६ डिसेंबर रोजी चाळीसगाव शहर पोलीस स्टेशनच्या गुन्हे शोध पथकाचे पोलीस अधिकारी व अंमलदार हे बस स्थानक परिसरात पेट्रोलिंग करत असताना एक इसम संशयास्पद हालचाली करताना दिसला.त्यास थांबवून विचारपूस केली असता उडवा-उडवीची उत्तरे देऊ लागल्याने त्यास पोलीस स्टेशनमध्ये आणण्यात आले. झडती घेतल्यावर त्याच्याकडे लोखंडी टामी,स्क्रू ड्रायव्हर असे घरफोडीचे साहित्य सापडले. अधिक चौकशी दरम्यान त्याने नाव अजयसिंग केवलसिंग ठाकुर (वय ३८ वर्षे, रा. वाडज, अहमदाबाद)असल्याचे सांगितले. त्याची माहिती घेतली असता वाडज पोलीस स्टेशन,अहमदाबाद अंतर्गत खुनाच्या गुन्ह्यात त्याला जन्मठेपेची शिक्षा ठोठावण्यात आली असल्याचे निष्पन्न झाले.
तो साबरमती मध्यवर्ती कारागृहात शिक्षा भोगत असताना पॅरोलवर सुटून कारागृहात परत न गेल्यामुळे राणीप पोलीस स्टेशन,अहमदाबाद येथे त्याच्यावर गुन्हा दाखल होता.चाळीसगाव पोलिसांनी तात्काळ अहमदाबाद गुन्हे शाखेला कळवून आरोपीस त्यांच्या ताब्यात दिले. ही कारवाई पोलीस अधीक्षक, जळगाव महेश्वर रेड्डी,अप्पर पोलीस अधीक्षक चाळीसगाव विभाग कविता नेरकर,उपविभागीय पोलीस अधिकारी राजेश चंदेल यांच्या मार्गदर्शनाखाली पोलीस निरीक्षक किरणकुमार कबाडी यांच्या नेतृत्वाखाली करण्यात आली. या कारवाईत पो.उ.नि.योगेश माळी,पो.उ.नि. संदीप घुले,पो.हे.कॉ.राहुल सोनवणे,पो.ना. भुषण पाटील,पो.ना.महेंद्र पाटील,पो.कॉ.विजय पाटील,पो.कॉ. ज्ञानेश्वर पाटोळे,वाहतूक शाखेचे पो.हे.कॉ.रणजित सोनवणे सहभागी होते.
