चाळीसगाव ( प्रतिनिधी ) – शहरातील कोतकर महाविद्यालयात एनसीसी भरतीसाठी आलेल्या 18 वर्षीय तरुणाचा आज मृत्यू झाल्याने हळहळ व्यक्त होत आहे. शहर पोलिसात अकस्मात मृत्यूची नोंद करण्यात आली आहे.
चाळीसगाव तालुक्यातील शिंदी येथील कैलास वासूदेव राठोड (वय-१८) हा तरूण एनसीसी भरतीसाठी चाळीसगाव एज्युकेशन सोसायटीचे कोतकर महाविद्यालयात आज आलेला होता.मैदानी चाचणीदरम्यान पळताना अचानक त्याला चक्कर आल्याने तो खाली पडला. त्यातच त्याचा दुदैवी मृत्यू झाल्याची धक्कादायक घटना आज दुपारी घडली त्याच्या मृत्यूचे नेमके कारण अद्याप स्पष्ट झालेले नसून कैलास राठोड याच्या मृतदेहाला शवविच्छेदनासाठी धुळे येथे नेण्यात आले आहे.
या घटनेने परिसरात हळहळ व्यक्त होत आहे. घटनेची माहिती मिळताच शहर पोलिसांनी घटनास्थळी धाव घेऊन पाहणी केली. वैद्यकीय अधिकारी यांच्या खबरीवरून चाळीसगाव शहर पोलिस स्थानकात अकस्मात मृत्यूची नोंद करण्यात आली आहे. पो नि के.के.पाटील यांच्या निर्देशानुसार पुढील तपास सुरू आहे.
