भुसावळ तालुक्यात राष्ट्रीय महामार्गावरील बोहर्डीनजीकची घटना
भुसावळ (प्रतिनिधी) :- तालुक्यातील भुसावळ-मुक्ताईनगर राष्ट्रीय महामार्ग क्रमांक ५३ वर रात्रीच्या सुमारास वाहन घेऊन पायी जाणाऱ्या तरुणाला दुसऱ्या दुचाकीने जबर धडक दिली. या धडकेत तरुणाचा जागीच मृत्यू झाला. घटना शुक्रवारी दि. २० रोजी रात्री साडे आठ वाजेच्या सुमारास बोहर्डी गावाजवळ घडली. याबाबत वरणगाव पोलिस स्टेशनला दुचाकीस्वाराविरुद्ध गुन्हा दाखल करण्यात आला आहे.
शेख नशिर शेख करीम कुरेशी (वय ३१, रा. कुरेशी मोहल्ला, फैजपूर) असे मृत तरुणाचे नाव आहे. शेख नशिर हे त्यांचा मित्रासोबत केळीची बियाणे भरण्याचे काम आटोपून टिव्हीएस मोटारसायकल (क्र. एमएच १६ सीएच ५८४३) वरून घरी परतत होते.(केसीएन)त्यांच्या दुचाकीचे पेट्रोल शिवांशी हॉटेलजवळ संपले. पेट्रोल घेण्यासाठी नशिर कुरेशी हे पायी इंडियन ऑईल पेट्रोल पंपावर जात असताना डिव्हायडर क्रॉस करत होता. तेव्हा वरणगावकडून भरधाव वेगाने येणाऱ्या मोटारसायकल (क्र. एमएच १९ डिई २३७३) ने त्यांना जोरात धडक दिली.
ही धडक इतकी जबर होती की, नशिर कुरेशी यांचा घटनास्थळीच डोक्याला मार लागल्याने अतीरक्तस्त्रावाने मृत्यू झाला. अपघात झाल्यावर मोटारसायकल चालक घटनेनंतर पसार झाला. उपस्थित नागरिकांच्या मदतीने मृतास वरणगाव ग्रामीण रुग्णालयात दाखल करण्यात आले, वैद्यकिय अधिकारी यांनी त्यांना तपासून मृत घोषित केले.(केसीएन) या प्रकरणी संबंधित मोटारसायकल चालकाविरुद्ध गुन्हा दाखल करण्यात आला असून वरणगाव पोलिस स्टेशनचे सहाय्यक पोलिस निरीक्षक अमित कुमार बागुल यांचे मार्गदशनाखाली तपास हेकॉ प्रेमचंद सपकाळे करीत आहेत.
