’लचका तोडणारा’ नव्हे, २४ तास उपलब्ध असणारा नगराध्यक्ष हवा: माजी आ. शिरीष चौधरींचे विरोधकांवर टीकास्त्र.
अमळनेर, (प्रतिनिधी): अमळनेर नगरपालिकेच्या आगामी निवडणुकीच्या पार्श्वभूमीवर राजकीय वातावरण चांगलेच तापले आहे. माजी आमदार शिरीष चौधरी यांनी लोकनियुक्त नगराध्यक्ष पदाचे उमेदवार डॉ. परिक्षित बाविस्कर यांच्या बाजूने जोरदार प्रचार करत शहराला ‘स्वच्छ’ नेतृत्वाची नितांत गरज असल्याचे मत व्यक्त केले.
माजी आमदार शिरीष चौधरी यांनी अमळनेर ही संतांची भूमी असल्याचे नमूद करत या शहराला चारित्र्यसंपन्न, अभ्यासू आणि प्रामाणिक नेतृत्वाची गरज असल्याचे स्पष्ट केले. त्यांनी उमेदवार डॉ. बाविस्कर यांच्या स्वच्छ प्रतिमेवर जोर दिला.
डॉ. परिक्षित बाविस्कर हे उच्चशिक्षित आणि मूळचे अमळनेरकर आहेत.
विरोधक त्यांच्या जळगाव येथील वास्तव्याबद्दल जे प्रश्न उपस्थित करत आहेत, ते केवळ दिशाभूल करणारे आहेत.
डॉ. बाविस्कर हे नम्र असून जनतेशी जोडलेले व्यक्तिमत्त्व आहे. त्यांच्या कुटुंबाचा समाजकारणातील ठसा अमळनेरमध्ये सर्वश्रुत आहे.
’लचका तोडणारा’ नगराध्यक्ष नको!
माजी आमदार चौधरी यांनी नगराध्यक्षाची जबाबदारी स्पष्ट करताना प्रतिस्पर्धी उमेदवाराच्या प्रामाणिकतेवर आणि उपलब्धतेवर प्रश्नचिन्ह उभे केले. नगराध्यक्ष हा २४ तास लोकांसाठी उपलब्ध असावा, शहराचे प्रश्न समजून घेणारा आणि विकासाला दिशा देणारा असावा. ”नगरपालिका हे जनतेची सेवा करण्याचे पवित्र व्यासपीठ आहे; जनतेची लूट, कुटनीती, भ्रष्ट व्यवहार आणि स्वार्थी उद्योग करण्याचे नाही.”
माजी आमदार शिरीष चौधरी, विरोधात असलेल्या विरोधक उमेदवारांनी केलेले ‘उद्योग’ अमळनेरकरांना माहीत असून, २ डिसेंबर रोजी जनता योग्य उत्तर देईल, असा विश्वास माजी आमदार चौधरी यांनी व्यक्त केला.
विकासाचे नवे पर्व होणार सुरू
माजी आमदार शिरीष चौधरी यांनी डॉ. बाविस्कर यांना उमेदवारी देताना, त्यांच्या अभ्यासू आणि खऱ्या अर्थाने लोकसेवक असलेल्या व्यक्तिमत्त्वाची दखल घेतली आहे. उपमुख्यमंत्री एकनाथ शिंदे आणि पालकमंत्री गुलाबराव पाटील यांच्या मार्गदर्शनाखाली अमळनेरला विकासासाठी महत्त्वाचा निधी मिळून शहरात विकासाचे नवे पर्व सुरू होईल, अशी ग्वाही त्यांनी दिली.
अखेरीस, अमळनेरकर यावेळी प्रामाणिकता आणि विकासाला मतदान करून २ डिसेंबर रोजी इतिहास घडवतील, असा निर्धार शहरवासीयांनी केल्याचे मत त्यांनी व्यक्त केले.
