वडाच्या झाडासह, गुरांचा चारा, झोपडे जळाले
जळगाव (प्रतिनिधी) : शहरात विविध ठिकाणी आणि एरंडोल तालुक्यात खर्ची येथे आग लागल्याच्या एकूण ६ घटना रविवारी दि. ६ एप्रिल रोजी दिवसभरात १२ तासात घडल्या आहेत. सर्व आगीवर जळगाव महापालिकेच्या अग्निशमन दलाने शर्थीचे प्रयत्न करून नियंत्रण मिळविले आहे. याबाबत कर्मचाऱ्यांचे कौतुक होत आहे.
* ग्रामीण विजपुरवठा खंडित होण्यापासून वाचला*
दुपारी साडेतीन वाजेच्या सुमारास एमआयडीसी भागात महावितरणच्या सबस्टेशन येथे गवताला आग लागली होती. हि आग पसरून तेथे एक झोपडे पेटले. तर या आगीवर २ अग्निशमन बंबांनी पाण्याचा मारा करून आटोक्यात आणली.(केएफएन) थोडावेळ आणखी आग पसरली असती तर ग्रामीण भागाचा वीजपुरवठा खंडित होण्याची भीती राहिली असती. अग्निशमन दलाच्या कर्मचाऱ्यांना महावितरण अधिकाऱ्यांनी धन्यवाद दिले.
१०० वर्षे जुने वडाचे झाड पेटले
जळगाव शहरात दक्षता नगरातील पोलीस वसाहतीत बिल्डिंग क्रमांक २७च्या मागे असलेले प्राचीन १०० ते १५० वर्ष जुने वडाचे झाड अचानक पेटले. नागरिकांनी अग्निशमन दलाच्या कमर्चाऱ्यांना माहिती दिली. तेथे एका बंबाने प्रयत्न करून आग विझविली. आग लागण्याचे कारण समजून आले नव्हते.
कचरा, कडबाकुट्टी जळाला
शहरातील आयटीआयजवळ सकाळी ११ वाजता महापालिकेच्या कचरा डेपोजवळ कचऱ्याला आग लागली होती. अग्निशमन दलाच्या बंबाने आग विझविली. यात किरकोळ नुकसान आहे. मात्र हि आग कोणीतरी लावली असावी असा अंदाज वर्तविण्यात आला आहे.(केएफएन)तर असोदा रस्त्यावर गॅस गोडाऊन मागे ४ वाजेच्या सुमारास शेतात आग लागली होती. यात जनावरांचा चारा, कडबा कुट्टी जळून खाक झाले आहे. शेतकरी संदीप नारखेडे यांचे नुकसान झाले आहे. तर खर्ची ता. एरंडोल येथे खळवाडीला आग लागल्याने गुरांसाठी ठेवलेला चारा जळून खाक झाला आहे. याठिकाणी धरणगाव व जळगाव पालिकेच्या अग्निशमन बंबाने आग विझवून मदत केली.
याशिवाय भादली रस्त्यावर सोमाणी कंपनीत लागलेली आग अशी दिवसभरात सहा आगीच्या घटनांमुळे जळगाव महापालिकेच्या अग्निशमन दलाची मोठी कसोटी दिवसभर पाहायला मिळाली. तरीही त्यांच्या कर्तव्यपूर्तीचे नागरिकांनी कौतुक केले.सर्व आगी महापालीकेचे अग्निशमन अधिकारी शशिकांत बारी यांचे मार्गदर्शनाखाली देविदास सुरवाडे, रोहिदास चौधरी, विजू पाटील, नंदकिशोर खडके, प्रकाश कुमावत, रवि बोरसे, निलेश सुर्वे आदींनी आग नियंत्रणात आणली.
