धरणगाव तालुक्यातील पाळधी येथील घटना
धरणगाव (प्रतिनिधी) :- तालुक्यातील पाळधी येथे महामार्गावर असलेल्या एसपी वाईन शॉपचे शटर उचकवून चोरट्यांनी ४२ हजार रुपये चोरून नेल्याची घटना उघडकीस आली आहे. या प्रकरणी पाळधी पोलीस स्टेशनला गुन्हा दाखल करण्यात आला आहे.
पाळधी महामार्गावर असलेल्या एस.पी. वाईन शॉपचे शटर चोरट्यांनी उचकवून आत प्रवेश केला. या वेळी त्यांनी तेथे असलेले सीसीटीव्ही फोडले. गल्ल्यात असलेले ४२ हजार रुपये लांबविले. यात काही नोटा तर चिल्लरचा समावेश होता. या आधी चोरट्यांनी पाटाजवळ असलेल्या भारत हार्डवेअर या दुकानाचे शटर उचकवून तेथील गल्ल्यात असलेली किरकोळ चिल्लर चोरून नेली. सोबतच येथे असलेला सीसीटीव्हीचा डीव्हीआरही सोबत नेला. येथे किरकोळ चोरी झाल्याने गुन्हा दाखल करण्यात आला नाही. घटनेची माहिती मिळताच पाळधीचे स.पो.नि. प्रशांत कंडारे व सहकाऱ्यांनी धाव घेतली. एसपी वाईन शॉपचे व्यवस्थापक भूषण जगताप यांनी दिलेल्या फिर्यादीनुसार, गुन्हा दाखल करण्यात आला आहे. पुढील तपास संदीप खंडारे करीत आहेत.
