मुक्ताईनगर शहरातील घटना सीसीटीव्हीत कैद
मुक्ताईनगर (प्रतिनिधी) :- शहरात काल पहाटेपर्यंत एकाच भागातील तीन घरे चोरट्यांनी फोडली आहे. चोरटयांनी एकूण ४१ हजार ५०० रुपयांची रोकड लंपास केली. या प्रकरणी चोरटे सीसीटीव्ही कॅमेऱ्यात कैद झाले आहे. मुक्ताईनगर पोलीस स्टेशनला गुन्हा दाखल करण्यात आला आहे.
याबाबत डॉ. शुभम पुरुषोत्तम कलंत्री (वय २९) यांनी मुक्ताईनगर पोलीस ठाण्यात दिलेल्या फिर्यादीनुसार, ते आई राजकौर कलंत्री आणि काका संतोषकुमार माणिकलाल कलंत्री (सरकारी वकील, मुक्ताईनगर कोर्ट) यांच्यासह गोदावरी नगर भागात राहत आहेत. दि. २७ सप्टेंबर रोजी रात्री १० वाजता घरातील सर्व सदस्य झोपले होते. शुभम हे खालच्या मजल्यावर तर आई व काका हॉलमध्ये झोपले होते. पहाटे सुमारास शुभम यांच्या आईने त्यांना उठवले व घरात चोरी झाल्याचे सांगितले. घराबाहेरून कोणतीही तोडफोड न करता चोरट्यांनी घराच्या किचनमार्गे प्रवेश करून वरच्या मजल्यावरील संतोष कलंत्री यांच्या ऑफिसमधील टेबलच्या ड्रॉवरमधून ५०० रुपयांच्या ५४ नोटा (एकूण २७ हजार रुपये) आणि काळ्या रंगाच्या पाकिटातील ५ हजाररुपये असा रोख ऐवज लंपास केला होता.
दरम्यान, याच परिसरातील मनोज अशोक कुलकर्णी यांच्या घरातसुद्धा चोरट्यांनी खिडकीची ग्रील कापून प्रवेश केला. घराच्या वरच्या मजल्यावरील बेडरूममधील कपाटातील लॉकरमधून अडीच हजार रुपये रोख आणि लेडीज पर्समधून ७ हजार रुपये चोरले गेले. तिसरी घटना शुभम यांच्या घरासमोर काही अंतरावर राहणाऱ्या सुजीत पंढरीनाथ पाटील यांच्या घरी घडली. येथेही खिडकीची ग्रील कापून अज्ञात चोरट्यांनी घरात घुसण्याचा प्रयत्न केला, मात्र काही नुकसान झाल्यानंतर ते निघून गेले. या तिन्ही घरफोडीच्या घटना एकाच रात्रीत चोरट्यांनी एकूण ४१ हजार ५०० रुपयांचा मुद्देमाल चोरून नेला. मुक्ताईनगर पोलिसांनी घटनास्थळाची पाहणी करून अज्ञात चोरट्यांविरोधात गुन्हा दाखल केला आहे. पुढील तपास सुरू आहे.
