चोपडा तालुक्यातील भार्डु येथील घटना
जळगाव (प्रतिनिधी) : चोपडा तालुक्यातील भार्डु येथे मामाच्या घरी राहत असताना एका २१ वर्षीय तरुणाने विषारी औषध घेऊन आत्महत्या करण्याचा प्रयत्न केला होता. मात्र उपचारादरम्यान त्याचा मृत्यू झाल्याची घटना दि. ३ मार्च रोजी घडली आहे. याप्रकरणी रामानंद नगर पोलीस स्टेशन येथे प्राथमिक अकस्मात मृत्यूची नोंद करण्यात आली आहे.
स्वप्नील दादाभाऊ भिल (वय २१, रा. कुसुमबा ता.जि. धुळे) असे मयत तरुणाचे नाव आहे. तो आई, वडील यांच्यासह राहत होता. एकुलता एक मुलगा होता. (केसीएन)स्वप्नीलचे वडील पुणे येथे मजुरीसाठी गेले आहेत. तर स्वप्नीलदेखील मामाच्या घरी भार्डु ता. चोपडा येथे राहून शेतमजुरी करीत होता. दरम्यान, रविवारी दि. २ मार्च रोजी संध्याकाळी ७ वाजेनंतर जेवण करून तो बाहेर गेला होता. काही वेळाने तो घरी आल्यावर विषप्राशन केल्याचे त्याने कुटुंबियांना सांगितले.
त्यानुसार त्याला तात्काळ जळगाव येथील शासकीय वैद्यकीय महाविद्यालय व रुग्णालयात उपचारासाठी दाखल करण्यात आले होते. मात्र सोमवारी दि. ३ मार्च रोजी दुपारी १२ वाजेच्या सुमारास स्वप्नीलचा उपचारादरम्यान मृत्यू झाला. एकुलता तरुण मुलाचा मृत्यू झाल्याने कुटुंबीयांनी शोक व्यक्त केला. तरुणाच्या मृत्यूमुळे भार्डु व कुसुमबा गावावर शोककळा पसरली आहे. रामानंद नगर पोलीस स्टेशनला प्राथमिक नोंद करण्यात आली आहे.
