झटापटीत पोलिसांवर उगारला कोयता, अंगावर दुचाकी घालण्याचा प्रयत्न
चोपडा ग्रामीण पोलिसांची कारवाई
जळगाव (प्रतिनिधी) : चोपडा तालुक्यातील लासुर रस्त्यावर गोपनीय माहितीवरून दोन संशयित आरोपींना ५ गावठी कट्टे, १ धारदार कोयता आणि २ मोबाईलसह चोपडा ग्रामीण पोलीस स्टेशनच्या कर्मचाऱ्यांनी शिताफीने पकडले आहे. या वेळेला झटापटीमध्ये पोलिसांवर संशयित आरोपीने चॉपर काढण्याचा व अंगावर वाहन घालण्याचा प्रयत्न केल्याची धक्कादायक माहिती पोलीस अधीक्षक डॉ. महेश्वर रेड्डी यांनी दिली आहे.
जळगावच्या सीमेवरील उमर्टी येथून सत्रासेन, लासुर या गावांच्या मार्गे दोन व्यक्ती त्यांच्या ताब्यातील दुचाकीने अवैध अग्निशस्त्र घेऊन जात असल्याबाबत गोपनीय माहिती चोपडा ग्रामीण पोलीस स्टेशनला मिळाली होती. त्यानुसार लासुर गावाजवळ पोलिसांनी सापळा रचला. त्या ठिकाणी निळ्या रंगाची स्पोर्ट्स बाईक येताना दिसल्याने त्यांना पोलिसांनी थांबवण्याचा प्रयत्न केला.(केसीएन)मात्र त्यांनी पोलिसांच्या अंगावर दुचाकी घालण्याचा प्रयत्न केला. या वेळेला त्यांना ताब्यात घेतले असता त्याच्यातील एकाने त्याच्या अंगात लपवून ठेवलेला चॉपर काढून एका पोलीस कर्मचाऱ्याला मारण्याचा प्रयत्न केला.
यात संशयित आरोपी मोहम्मद लतीफ शेख सलीम (वय २४, रा. माणिक नगर, जि. संभाजीनगर) व इरफान खान अयुब खान (वय २३, रा. नारशेन कॉलनी, छत्रपती संभाजी नगर) यांना अटक करण्यात आली आहे. (केसीएन)त्यांच्या जवळील सॅकची झडती घेतली असता त्यात १० हजार रुपये किमतीचे १० जिवंत काडतूस, १ हजार रुपये किमतीचा लोखंडी कोयता तसेच २० हजार रुपये किमतीचे २ मोबाईल, हँडसेट आणि ५० हजार रुपये किमतीची सुझुकी स्पोर्ट्स बाईक यासह ५ गावठी कट्टे १ लाख २५ हजार रुपयांचे असा एकूण २ लाख ६ हजार ९४० रुपयांचा मुद्देमाल जप्त करण्यात आला आहे.
सदरची कारवाई पोलीस अधीक्षक डॉ. महेश्वर रेड्डी, अप्पर पोलीस अधीक्षक कविता नेरकर, डीवायएसपी कुणाल सोनवणे, निरीक्षक कावेरी कमलाकर यांच्या मार्गदर्शनाखाली शशिकांत पारधी, राहुल रणधीर, रावसाहेब पाटील, दीपक शिंदे, अभिषेक सोनवणे, आत्माराम अहिरे अशांनी मिळून केली आहे.
