नूतन मंत्री अनिल पाटील यांच्यावर अनोखी वेळ, रविंद्र पाटलांचीही तीच स्थिती
जळगाव (प्रतिनिधी) – जिल्ह्यातील अमळनेर मतदारसंघाचे आमदार अनिल भाईदास पाटील यांनी चारच दिवसांपूर्वी मुख्यमंत्री शिंदे, उपमुख्यमंत्री फडणवीस यांना काळे झेंडे दाखविले होते. आणि आता रविवारी मात्र अजितदादा शिंदे-फडणवीस सरकारमध्ये आले, तेव्हा मंत्रिपद मिळाल्याने अनिल पाटील यांच्यावर ज्यांना काळे झेंडे दाखविले, त्यांच्याकडेच मंत्रिपदाची शपथ घेण्याची वेळ आली.
राजभवनात रविवारी २ जुलै रोजी मंत्रिमंडळाचा विस्तार झाला. यात राष्ट्रवादी काँग्रेस पक्षाचे अजितदादा पवार यांनी सातव्यांदा उपमुख्यमंत्री पदाची शपथ घेतली आहे. तर त्यांच्यासह ९ सदस्यांनी देखील शपथ घेतली. यात अमळनेरचे अनिल पाटील यांनाही मंत्रिपदाची शपथ घेण्याची संधी मिळाली.
चार दिवसांपूर्वी २७ जूनला “शासन आपल्या दारी” कार्यक्रमाला मुख्यमंत्री एकनाथ शिंदे व उपमुख्यमंत्री देवेंद्र फडणवीस यांनी उपस्थिती दिली होती. त्यावेळी त्यांच्या ताफ्याला राष्ट्रवादी काँग्रेस पक्षातर्फे काळे झेंडे दाखविण्यात आले होते. त्यावेळी आमदार अनिल पाटील यांनीदेखील काळे झेंडे घेऊन निषेध केला होता.
मात्र, चारच दिवसात चित्र बदलले आणि नेहमीप्रमाणे अजित पवार यांनी भूकंप करीत सत्ताधारी भाजप शिवसेना सरकारमध्ये सहभागी झाले. त्यात, अनिल भाईदास पाटील यांनीही अजित पवार यांच्यासह जाऊन मंत्रिपदाची शपथ घेतली. याचप्रकारे राष्ट्रवादी काँग्रेसचे युवक जिल्हाध्यक्ष रवींद्र नाना पाटील यांनीही मुख्यमंत्र्यांच्या ताफ्याला काळे फुगे सोडून निषेध केला होता. आता याच रविंद्र नाना पाटील यांनीही अजितदादांना समर्थन देऊन त्यांच्या निर्णयाचे स्वागत म्हणून फटाके फोडून आनंदोत्सव केला.
