शांतता व सुव्यवस्थेसाठी पहाटे विशेष कॉम्बिंग ऑपरेशन; ८ पकड वॉरंटची अंमलबजावणी
चाळीसगाव (विशेष प्रतिनिधी): जळगाव जिल्ह्यात गुन्हेगारी प्रवृत्तींचे कंबरडे मोडण्यासाठी आणि कायदा व सुव्यवस्था अबाधित राखण्यासाठी पोलीस प्रशासनाने आता अत्यंत आक्रमक पाऊल उचलले आहे. याच मोहिमेचा भाग म्हणून आज, बुधवार २४ जून रोजी पहाटे चाळीसगाव शहर पोलीस ठाण्याच्या हद्दीत पोलिसांनी प्रचंड फौजफाट्यासह अचानक धडक ‘कॉम्बिंग ऑपरेशन’ राबवले. पहाटे २ ते ४ वाजेच्या दरम्यान चाललेल्या या थरारक मोहिमेत पोलिसांनी ४४ संशयितांना ताब्यात घेतले असून, ३९ लाख रुपयांच्या ३ आलिशान कार जप्त केल्या आहेत. विशेष म्हणजे, या मोहिमेदरम्यान नवनाथ नगर भागात एका घरातून तब्बल १९ तलवारी आणि ११ चॉपरसह धारदार शस्त्रांचा मोठा साठा जप्त करण्यात आल्याने शहरात प्रचंड खळबळ उडाली आहे.
महिलेच्या घरात शस्त्रास्त्रांचे कोठार
कॉम्बिंग ऑपरेशन सुरू असताना पोलिसांना मिळालेल्या एका गुप्त माहितीच्या आधारे, चाळीसगाव येथील नवनाथ नगर परिसरात राहणाऱ्या आरती किरण देठे (वय ३७ वर्षे) हिच्या घरावर पोलिसांनी तात्काळ छापा टाकला. या घरझडती दरम्यान पोलिसांना घरात लपवून ठेवलेला धारदार शस्त्रांचा मोठा साठा आढळून आला. पोलिसांनी या कारवाईत तब्बल १९ धारदार तलवारी आणि ११ चॉपर, चाकू व गुप्ती असा घातक शस्त्रांचा साठा हस्तगत केला आहे. एका महिलेच्या घरात एवढ्या मोठ्या प्रमाणावर शस्त्रे कशासाठी आणून ठेवली होती? याचा शोध आता पोलीस घेत आहेत.
पहाटेच्या अंधारात ८० गुन्हेगारांची झाडाझडती
जिल्हा पोलीस अधीक्षकांच्या आदेशान्वये चाळीसगाव शहरात एकाच वेळी विविध भागात पोलिसांनी वेढा घातला. या मोहिमेत पोलिसांनी रेकॉर्डवरील तब्बल ८० सराईत आरोपी आणि गुन्हेगारांची प्रत्यक्ष पडताळणी करत त्यांच्या घरांची कसून तपासणी केली. यापैकी ४४ जणांना पोलिसांनी पुढील चौकशीसाठी ताब्यात घेऊन थेट पोलीस ठाण्यात आणले.
मोठ्या पोलीस फौजेचा सहभाग:
ही विशेष मोहीम जळगावचे पोलीस अधीक्षक, चाळीसगावचे अप्पर पोलीस अधीक्षक आणि उपविभागीय पोलीस अधिकारी यांच्या थेट मार्गदर्शनाखाली पार पडली. या कारवाईत १ पोलीस निरीक्षक, १ सहाय्यक पोलीस निरीक्षक, ५ पोलीस उपनिरीक्षक, ६० पोलीस अमलदार, एलसीबी (LCB) ची विशेष पथके आणि ३ आरसीपी (RCP) पथकांचा मोठा ताफा सहभागी झाला होता.
