चाळीसगाव (प्रतिनिधी) – शहरातील मालेगाव रोडवरील अक्षदा मंगल कार्यालय परिसरातील लेडीज वॉशरूममध्ये १३ वर्षीय अल्पवयीन मुलीवर लैंगिक अत्याचार केल्याचा आरोप समोर आला आहे. या प्रकरणी चाळीसगाव शहर पोलिस ठाण्यात तिघांविरुद्ध भारतीय न्याय संहितेच्या विविध कलमांसह बालकांचे लैंगिक अपराधांपासून संरक्षण अधिनियम (POCSO Act), २०१२ अंतर्गत गुन्हा दाखल करण्यात आला आहे.
या प्रकरणातील आरोपी राहुल आणि आर्य यांना पोलिसांनी अटक केली आहे. पोलिसांनी दिलेल्या माहितीनुसार, पीडित अल्पवयीन मुलीचे वय १३ वर्षे असुन ती चाळीसगाव तालुक्यातील रहिवासी असून शिक्षण घेत आहे. तिच्या तक्रारीवरून हा गुन्हा दाखल करण्यात आला आहे.
वॉशरूममध्ये नेऊन अत्याचार केल्याचा आरोप
फिर्यादीच्या तक्रारीनुसार, २३ सप्टेंबर २०२६ रोजी सकाळी करण्यात आले आहे. तक्रारीतील माहितीनुसार आरोपी क्रमांक १ ते ३ यांनी संगनमत करून पीडितेला आरोपी क्रमांक ३ श्रद्धा हिने जबरदस्तीने लेडीज वॉशरूममध्ये नेल्याचा आरोप आहे.
त्यानंतर आरोपी क्रमांक १ राहुल याने पीडितेवर जबरदस्ती केल्याचा आरोप तक्रारीत करण्यात आला आहे. पीडितेने विरोध करण्याचा प्रयत्न केला असता आरोपी क्रमांक ३ श्रद्धाने तिचे तोंड दाबून हात मागे धरल्याचे नमूद आहे. त्यानंतर आरोपी क्रमांक २ आर्य यानेही तिच्यावर अत्याचार केल्याचा आरोप आहे. तक्रारीनुसार, आरोपींनी पीडितेला घटनेबाबत कोणाला सांगू नये, यासाठी धमकी दिल्याचेही नमूद करण्यात आले आहे.
तिघांविरुद्ध गंभीर कलमांन्वये गुन्हा
या प्रकरणी चाळीसगाव शहर पोलिस ठाण्यात गुन्हा रजिस्टर क्रमांक ४५७/२०२६ दाखल करण्यात आला आहे. भारतीय न्याय संहितेच्या कलम ६४(२)(i), ६४(२)(m), ६५(१), ७०(२), ३५१(२), ४९ व ३(५) तसेच बालकांचे लैंगिक अपराधांपासून संरक्षण अधिनियम, २०१२ मधील कलम ४, ६, ८, १०, १२ व १७ अन्वये गुन्हा दाखल करण्यात आला आहे.
या प्रकरणातील आरोपींमध्ये राहुल (पूर्ण नाव माहित नाही), आर्य (पूर्ण नाव माहित नाही), दोघेही रा. मध्य प्रदेश, तसेच श्रद्धा (पूर्ण नाव माहित नाही), रा. चाळीसगाव, यांचा समावेश असल्याचे तक्रारीत नमूद आहे.
दोन आरोपी अटकेत; तपास सुरू
घटनेची तक्रार दाखल झाल्यानंतर पोलिसांनी कारवाई करत आरोपी क्रमांक १ राहुल आणि आरोपी क्रमांक २ आर्य यांना अटक केली आहे. आरोपी क्रमांक ३ श्रद्धाबाबत पुढील कायदेशीर कारवाई सुरू असल्याचे नमूद करण्यात आले आहे.
या प्रकरणाचा पुढील तपास पोलीस उपनिरीक्षक कुणाल चव्हाण, चाळीसगाव शहर पोलिस ठाणे करीत आहेत.
