चाळीसगाव (प्रतिनिधी):- शहरात गोवंशाची अमानुष पद्धतीने वाहतूक केल्याप्रकरणी पोलिसांनी कारवाई करत सुमारे ३ लाख ७० हजार रुपयांचा मुद्देमाल जप्त केला आहे. या प्रकरणी एका आरोपीविरुद्ध गुन्हा दाखल करण्यात आला असून पुढील तपास सुरू आहे.
ही घटना २ एप्रिल २०२६ रोजी दुपारी १.४५ वाजता चाळीसगाव शहरातील घाटरोड ते कन्नड बायपास रस्त्यावर उघडकीस आली. पोलिस कॉन्स्टेबल बाबासाहेब लक्ष्मण खरात (वय ३५) यांनी दिलेल्या फिर्यादीवरून गुन्हा नोंदविण्यात आला आहे.
आरोपी अरबाज शेख अजिज शेख (वय २५, रा. पिशोर, ता. कन्नड, जि. संभाजीनगर) याने विनापरवाना व बेकायदेशीररित्या गोवंश जनावरांना दोरीने बांधून, निर्दयपणे वाहनात कोंबून वाहतूक केल्याचे समोर आले आहे.
या कारवाईत पोलिसांनी दोन बैल (प्रत्येकी अंदाजे १० हजार रुपये किंमत) तसेच महिंद्रा कंपनीची बोलेरो पिकअप (क्र. MH-20-DE-3396, अंदाजे ३.५० लाख रुपये किंमत) असा एकूण ३.७० लाख रुपयांचा मुद्देमाल जप्त केला आहे.
या प्रकरणी प्राणी संरक्षण कायदा १९६० तसेच मोटार वाहन कायद्यानुसार गुन्हा दाखल करण्यात आला असून अधिक तपास पोलीस उपनिरीक्षक सुभाष पाटील करीत आहेत. आरोपीला अद्याप अटक करण्यात आलेली नाही.
