पाचोरा शहरातील घटना
जळगाव (प्रतिनिधी) :- पाचोरा शहरात भाजीमार्केटजवळ असलेल्या बिल्डिंगच्या जिन्यावरून खाली पडलेल्या तरुणावर जळगावातील खाजगी रुग्णालयात उपचार सुरु होते. शुक्रवारी ५ जानेवारी रोजी उपचारादरम्यान त्याचा मृत्यू झाला असून पाचोरा पोलीस स्टेशनला अकस्मात मृत्यूची नोंद करण्याचे काम सुरु होते.
भूषण अशोक पाटील (वय २४, रा. देशमुखवाडी, पाचोरा) असे मयत तरुणाचे नाव आहे. तो आईसह पाचोरा शहरात राहत होता. सेंट्रिंग काम करून तो उदरनिर्वाह करीत होता. तो १ जानेवारी रोजी संध्याकाळी ५ वाजेच्या सुमारास पाचोरा शहरातील भाजी मार्केट जवळील शिव रेडियम समोरील कॉम्प्लेक्सला मित्रासह गेला होता. तेव्हा पहिल्या मजल्यावरून खाली पडल्यामुळे त्याला पाचोरा ग्रामीण रुग्णालयात दाखल करण्यात आले होते. त्यानंतर पुढील उपचारासाठी जळगावातील खाजगी रुग्णालयात दाखल करण्यात आले होते.
उपचारादरम्यान सदर युवकाची मृत्यूशी झुंज अपयशी ठरली. जळगावात दि. ५ जानेवारी रोजी ४ दिवसानंतर पहाटेच ६ वाजेच्या सुमारास उपचारादरम्यान त्याचा मृत्यू झाल्याची दुर्दैवी घटना घडली. याप्रकरणी पाचोरा पोलीस स्टेशनला अकस्मात मृत्यूची नोंद करण्यात आली आहे.
