कुजलेल्या मृतदेहाच्या शवविच्छेदन अहवालातुन उघड ; ओळख अस्पष्ट
भुसावळ (प्रतिनिधी) : भुसावळ शहरातील राष्ट्रीय महामार्गावरील नवोदय विद्यालयामागील शेतात १० ते १२ वर्षीय तरुणाचा नग्न अवस्थेतील कुजलेला मृतदेह गुरुवारी आढळला होता. दरम्यान, आता शवविच्छेदन अहवाल आला असून त्यानुसार सदर बालकाचा गळा दाबून त्याचा खून केल्याचे निष्पन्न झाले आहे. त्यानुसार भुसावळ तालुका पोलीस स्टेशनला खुनाचा गुन्हा दाखल करण्यात आला आहे. यामुळे पुन्हा एकदा जिल्ह्यात खळबळ उडाली आहे.
साकेगाव शिवारातील नवोदय विद्यालयामागील शेत गट क्रमांक ३१७/१ मधील दक्षिण बांधालगत १० ते १२ वर्षीय तरुणाचा कुजलेला व नग्न अवस्थेतील मृतदेह पडून असल्याची माहिती पोलिसांना मिळाली होती. पोलीस उपअधीक्षक कृष्णात पिंगळे, तालुक्याचे निरीक्षक महेश गायकवाड आर्दीनी धाव घेतली. मृतदेहाची ओळख पटलेली नसून ग्रामीण रुग्णालयात मृतदेह शवविच्छेदनासाठी हलवण्यात आला होता.
दरम्यान भुसावळ ट्रॉमा सेंटर येथे शवविच्छेदन झाल्यानंतर त्याचा व्हीसेरा पाठविण्यात आला होता. त्यानुसार अहवाल आता पोलिसांना प्राप्त झालेला असून त्यामध्ये बालकाचा गळा आवळून खुन केल्याचे निष्पन्न झाले आहे. त्यामुळे हवालदार संजय भोई यांच्या फिर्यादीवरून भुसावळ तालुका पोलीस स्टेशनला खुनाचा गुन्हा दाखल करण्यात आला आहे. दरम्यान सदर बालकाची ओळख पटलेली नसून पोलिसांपुढे आता तेही आव्हान आहे.
