जळगाव ( प्रतिनिधी ) – भुसावळ शहरातील उड्डाणपुलावर भरधाव डंपरने दुचाकीला धडक दिल्याने वृद्धेचा जागीच मृत्यू झाला तर वृद्धेसोबतचा जावई जखमी झाला
अपघातानंतर ट्रकचालक वाहनासह फरार झाला शहर पोलिसात अज्ञात ट्रक चालकाविरोधात गुन्हा दाखल करण्यात आला. अपघातात सरस्वती मुरलीधर वाघोदे (75, जामनेर रोड, दत्त धाम, भुसावळ) यांचा जागीच मृत्यू झाला त्यांचे जावई सुरेश भोळे जखमी झाले . अपघातानंतर काही वेळ वाहतूक ठप्प झाली होती. शहर पोलिसांनी वाहतूक सुरळीत केली.
सरस्वती वाघोदे या गत आठवड्यात भादली येथे त्यांच्या मुलीकडे गेल्या होत्या. मुलीच्या मुलाच्या (नातू) हाताचे ऑपरेशन औरंगाबाद येथे असल्याने त्यांची मुलगी औरंगाबाद येथे गेल्याने सरस्वतीबाई भादलीत मुलीकडे थांबून होत्या. मंगळवारी सकाळी त्या जावई सुरेश भोळे यांच्यासोबत भुसावळात दुचाकी (एम.एच.19 बी.यु.5997) ने येत असता महामार्गावरील उड्डाणपुलावर दुचाकीला अज्ञात ट्रक चालकाने पाठीमागून धडक दिल्याने सरस्वतीबाई रोडवर पडल्या व त्यांच्या अंगावरून ट्रकची चाके गेल्याने जागीच त्यांचा मृत्यू झाला सुरेश भोळे जखमी झाले.
मंगळवारी पहाटे सात वाजेच्या सुमारास झालेल्या अपघातात सरस्वताबाई वाघोदे यांच्या अपघाती मृत्यूनंतर दत्त धाम परीसरात शोककळा पसरली. मयताची औरंगाबाद येथे गेलेल्या कन्येने तत्काळ भुसावळात धाव घेतली बडोदा येथील मुलगीही भुसावळात दाखल होत असल्याचे सांगण्यात आले.
शहर पोलिसांनी अज्ञात वाहन चालकाविरोधात सुरेश भोळे यांच्या फिर्यादीनुसार गुन्हा दाखल केला आहे. भोळे यांच्यावर खाजगी रुग्णालयात उपचार सुरू असून शहर पोलिसांनी अपघाताला कारणीभूत ट्रकचा सीसीटीव्ही कॅमेर्यांद्वारे शोध सुरू केला आहे. तपास पो नि प्रताप इंगळे यांच्या मार्गदर्शनाखाली सुरू आहे.
