भुसावळ दुहेरी हत्याकांड : इंदौरमधून खरेदी केली पिस्तुले
भुसावळ (प्रतिनिधी) : भुसावळातील भाजपाचे माजी नगरसेवक संतोष बारसे व सुनील राखुंडे यांची गोळ्या झाडून हत्या केल्याप्रकरणात तीन संशयित आरोपींना अटक करण्यात आली आहे. अटकेतील संशयित आरोपी करण पथरोड याने इंदौर येथून आणलेली तीन गावठी पिस्टल यावल तालुक्यातील अकलूद येथील एका तरुणाकडे ठेवल्याचे तपासात समोर आल्यानंतर त्यालाही शनिवारी दुपारी अटक करण्यात आली. दुहेरी हत्याकांडातील आरोपींची संख्या आता चार झाली आहे.
संशयीत शिव व करण पथरोड यांनी हत्या करण्याच्या उद्देशाने इंदौर येथून तीन गावठी पिस्टल व सुमारे ३० वर जिवंत काडतूस खरेदी केले. हा शस्त्रसाठा अकलूद, ता.यावल येथील किरण कोळी या संशयीताच्या घरात ठेवला. हत्याकांडाच्या आदल्या दिवशी मंगळवारी संशयीतांनी तीन्ही पिस्टल व जिवंत काडतूस घेवून बुधवारी रात्री साडेनऊ वाजेच्या सुमारास बारसे व राखुंडे यांची निर्घूण हत्या केली.
तसेच भारत नगरातही गोळ्या झाडून दहशत निर्माण केली. याप्रकरणी गुन्हा दाखल झाल्यानंतर शहर पोलिसांनी रिपाइं जिल्हाध्यक्ष राजू सूर्यवंशी, विनोद चावरिया व करण पथरोड यांना अटक केली होती. शनिवारी शहर पोलिसांनी किरण कोळी याला आरोपींचे शस्त्र लपवण्यात मदत केल्याप्रकरणी अटक केली. पोलिसांनी आता इंदौर येथील शस्त्र पुरवठादाराचा शोध सुरू केला आहे तर पथरोड टोळीतील अन्य सदस्यांच्या मागावर पोलिसांची चार पथके रवाना आहेत.
अटकेतील तिघा संशयीतांना शहरातील तणावाची स्थिती पाहता शुक्रवारी रात्री ११ वाजता प्रचंड बंदोबस्तात ऐनवेळी रेल्वे न्यायालयात हजर करण्यात आले. तिघांनाही स्वतंत्र वाहनांमधून न्यायालयात आणल्यानंतर रेल्वे न्यायालयाने ६ जूनपर्यंत तिघांना पोलीस कोठडी सुनावली. डीवायएसपी कृष्णात पिंगळे यांच्या मार्गदर्शनाखाली पोलीस निरीक्षक संदीप रणदिवे दुहेरी हत्याकांड प्रकरणाचा तपास करीत आहे.