तापी नदी परिसरात फिरत असताना भुसावळात पोलिसांनी घेतले शिताफीने ताब्यात
जळगाव / भुसावळ (प्रतिनिधी) : तालुक्यातील चिंचखेडा शिवारामध्ये एका सहा वर्षीय बालिकेवर ३५ वर्षीय संशयित आरोपीने चॉकलेटचे आमिष दाखवून तिच्यावर लैंगिक अत्याचार करीत तिचा खून करून फेकून दिल्याची धक्कादायक घटना मंगळवार दि. ११ जून रोजी संध्याकाळी उघडकीस आली होती. या घटनेतील नराधम फरार झाला होता. अखेर ९ दिवसांनी नराधमाला भुसावळ तालुक्यातील तापी नदीच्या परिसरातून दुग्ग्याची देवी मंदिरजवळ भुसावळ बाजारपेठ पोलीस स्टेशन व स्थानिक गुन्हे अन्वेषण शाखा (एलसीबी) ने शिताफीने ताब्यात घेतले आहे.
जामनेर तालुक्यातील एका गावात सदर बालिकेचे आई-वडील मंगळवारी दुपारी सकाळी मोलमजुरीसाठी बाहेर गेले होता. बालिका घरी एकटीच असल्याचा गैरफायदा संशयित आरोपीने घेतला होता. संशयित आरोपी सुभाष इमाजी भिल (वय ३५, रा. चिंचखेडा) याने सदर मुलीला घराबाहेर बोलून तुला चॉकलेट घेऊन देतो असे आमिष दाखवले. त्यानंतर गावाच्या बाहेर केळीच्या मळ्यात नेत तिच्यावर लैंगिक अत्याचार केला . त्यानंतर तिचा निर्घृण खून करून तो पसार झाला होता. सदर घटना ही मंगळवार दि. ११ जून रोजी संध्याकाळी ७ वाजेच्या सुमारास उघडकीस आली होती.
या धक्कादायक घटनेमुळे जामनेर तालुका हादरला होता. जामनेर पोलीस स्टेशनला गुन्हा दाखल करण्यात आला होता. फरार नराधम सुभाष भिल याचा शोध सुरु होता. दरम्यान पोलिसांना माहिती मिळाली होती. त्यानुसार भुसावळ बाजारपेठ पोलीस स्टेशन व स्थानिक गुन्हे अन्वेषण शाखा (एलसीबी) ने संयुक्तरित्या भुसावळ शहर पोलीस स्टेशनच्या हद्दीत त्याला पकडलं. तापी नदीच्या परिसरातून दुग्ग्याची देवी मंदिरजवळ भिल वस्तीत असल्याचे कळताच त्याला शिताफीने ताब्यात घेण्यात आले.
तेथून त्याला भुसावळ बाजारपेठ पोलीस स्टेशनला नेण्यात आले आहे. तेथून चौकशीसाठी जळगाव येथे नेण्यात आले आहे. त्यानंतर रात्री जामनेर पोलीस स्टेशनला पुढील कार्यवाहीसाठी ताब्यात देण्यात येणार आहे. सदर कारवाई पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, एलसीबीचे वरिष्ठ निरीक्षक बबन आव्हाड यांच्या मार्गदर्शनाखाली एपीआय विशाल पाटील, कमलाकर बागुल, संजय हिवरकर, भुसावळ बाजारपेठचे कर्मचारी उमाकांत पाटील, प्रशांत परदेशी, रमण सुरळकर, भुसावळ शहरचे राहुल भोई यांनी केली आहे.
