जळगाव (प्रतिनिधी) – कर्तव्य आटोपून नगर जिल्ह्यातील शिर्डीहून दुचाकीने घरी परतणाऱ्या पोलिसाचा झाडावर दुचाकी आदळल्याने झालेल्या भीषण अपघातात मृत्यू झाल्याची दुर्दैवी घटना आज शनिवारी ५ डिसेंबर रोजी पहाटे ५ वाजेच्या सुमारास तालुक्यातील शिरसोली रोडवर एम एच १९ हॉटेल जवळ घडली. यात आणखी एक पोलिस कर्मचारी गंभीर जखमी झाला असून त्याला खासगी रुग्णालयात दाखल करण्यात आले आहे.
सागर रमजान तडवी (वय-३०) रा. हंबर्डी ता. यावल ह.मु. पोलीस लाईन, जिल्हा पेठ असे मयताचे नाव आहे. ते रामानंदनगर पोलिस ठाण्याला अगोदर कार्यरत होते. त्यानंतर ते मुख्यालयात नोकरीला होते. जळगावात ते आईसोबत राहत होते. काही महिन्यांपूर्वी त्याची शिर्डी येथील देवस्थानाला बंदोबस्त म्हणून नेमणूक करण्यात आली होती. दर आठवड्याला जळगाव येथे आईला भेटण्यासाठी येत होते. काल शुक्रवारी रात्री १२ वाजेच्या सुमारास पोलिस कर्मचारी संतोष बोरसे यांच्यासह सागर तडवी दुचाकीने जळगावला येण्यासाठी निघाले होते. आज पहाटे ५ वाजेच्या सुमारास जळगाव-शिरसोली रस्त्यावरील देवकर वैद्यकीय महाविद्यालयाच्या जवळ हॉटेल एम एच १९ समोर अज्ञात वाहनाने सागर तडवीची दुचाकी (एम.एच. १९ डी.एल.५३७०) ही झाडाला आदळल्याने सागर तडवी याचा जागीच मृत्यू झाला. तर सोबत असलेला पोलिस कर्मचारी संतोष बोरसे हा गंभीर जखमी झाला आहे. जखमी झालेल्या पोलिस कर्मचार्याला तातडीने खासगी रुग्णालयात उपचारार्थ दाखल करण्यात आले तर मयत सागर तडवी याचा मृतदेह जिल्हा रुग्णालयात शवविच्छेदनासाठी आणण्यात आला. दरम्यान पोलीस मित्र परिवार आणि नातेवाईकांनी जिल्हा रुग्णालयात मोठी गर्दी केली होती. तसेच हा अपघात नसून घातपात असण्याची शक्यता नातेवाईकांकडूनव्यक्त होत आहे.
मयत सागर तडवी याचा २२ नोव्हेंबर रोजी फैजपूर येथील मुलीशी साखरपुडा झाला होता. पश्चात आई, दोन विवाहित बहिणी असा परिवार आहे. या घटनेप्रकरणी एमआयडीसी पोलीस ठाण्यात अकस्मात मृत्यूची नोंद करण्याचे काम सुरू होते. प्राथमिक तपास पीएसआय रामकृष्ण पाटील करीत आहे.
