जळगाव तालुक्यातील कुसुंबा येथील घटना
जळगाव (प्रतिनिधी) :- तालुक्यातील कुसुंबा गावी असणाऱ्या बेलदारवाडी येथे भांडण सोडविण्यास गेलेल्या तरुणावर धारदार शस्त्राने पोटावर वार करून गंभीर जखमी केल्याची घटना दि. १५ रोजी रात्री ८ वाजेच्या सुमारास घडली आहे. याप्रकरणी एमआयडीसी पोलीस स्टेशनला एकाविरुद्ध गुन्हा दाखल करण्यात आला आहे.
कुसुंबा येथील रहिवाशी ईश्वर निवृत्ती लोहार (वय २४, रा. कुसुंबा) हा तरुण जखमी झाला आहे. तो मजुरी करून आपला उदरनिर्वाह करतो. दि. १५ रोजी बेलदारवाडी येथे रात्री ८ वाजेच्या सुमारास संशयित आरोपी निलेश कोळी हा ओम साई राम मित्र मंडळाच्या देवी बसविण्याच्या ठिकाणी आला होता. तेथे त्याचे कृष्णा भालेराव यांच्याशी भांडण सुरु झाले. हे भांडण सोडविण्यासाठी ईश्वर लोहार हा मध्ये पडला. याचे वाईट वाटून संशयित आरोपी निलेश याने ईश्वर याला शिवीगाळ करून हातातील धारदार शस्त्राने पोटावर वार करीत गंभीर जखमी केले .
आजूबाजूच्या लोकांनी त्याला रुग्णालयात उपचारासाठी दाखल केले. तेथे त्याच्यावर उपचार सुरु आहे. याबाबत एमआयडीसी पोलीस स्टेशनला संशयित आरोपी निलेश कोळी याच्याविरुद्ध गुन्हा दाखल करण्यात आला असून तपास पोलीस उप निरीक्षक अनिस शेख करीत आहे.
