१२ किलो तांब्याच्या कॉपर कॉईलसह सुमारे ३ हजार लिटर ट्रान्सफॉर्मर ऑईल चोरी; अज्ञात चोरट्यांविरुद्ध गुन्हा दाखल
पोलिसांकडून मिळालेल्या माहितीनुसार, कजगाव (ता. भडगाव) येथील विद्युत उपकेंद्रातून सुमारे ३ लाख रुपये किमतीची आणि अंदाजे १२ किलो वजनाची कॉपर कॉईल तसेच सुमारे १ लाख ६० हजार रुपये किमतीचे अंदाजे ३ हजार लिटर ट्रान्सफॉर्मर ऑईल चोरीस गेले आहे.
ही चोरी २२ ऑगस्ट २०२६ रोजी सकाळी ९ वाजेपासून २३ ऑगस्ट रोजी दुपारी २ वाजेपर्यंतच्या कालावधीत झाल्याचा प्राथमिक अंदाज आहे. अज्ञात चोरट्यांनी विद्युत उपकेंद्रातील साहित्याची तोडफोड करून विविध वस्तूंचे नुकसान केल्याचेही तक्रारीत नमूद करण्यात आले आहे.
चोरट्यांनी उपकेंद्रातील काही उपकरणे व साहित्य तोडून त्यातील मौल्यवान भाग काढून नेल्याचे समोर आले आहे. चोरीमुळे विद्युत उपकेंद्राचे नुकसान झाले असून, या घटनेमुळे परिसरात खळबळ उडाली आहे.
या प्रकरणी निखिल नारायणजी झाडे (वय ३९) यांनी भडगाव पोलीस ठाण्यात फिर्याद दिली. त्यांच्या फिर्यादीवरून भडगाव पोलीस ठाण्यात गुन्हा रजिस्टर क्रमांक २७२/२०२६ नुसार भारतीय न्याय संहिता २०२३ मधील कलम ३०३(२) अन्वये चोरीचा गुन्हा दाखल करण्यात आला आहे.
घटनेची माहिती मिळताच पोलिसांनी तपास सुरू केला असून, अज्ञात चोरट्यांचा शोध घेण्यात येत आहे. परिसरातील सीसीटीव्ही फुटेज तसेच इतर उपलब्ध पुराव्यांच्या आधारे तपास केला जात आहे.
या गुन्ह्याचा पुढील तपास पोलीस हेड कॉन्स्टेबल किशोर सोनवणे करीत आहेत. अज्ञात आरोपींचा शोध घेऊन चोरीस गेलेला मुद्देमाल हस्तगत करण्याचे आव्हान पोलिसांसमोर आहे.
