जळगाव जिल्हा बँक निवडणूक: अर्जांच्या छाननीत ९३ जणांचे अर्ज बाद; दिग्गजांना धक्का तर रक्षा खडसे यांना दिलासा

जळगाव (प्रतिनिधी): जळगाव जिल्हा मध्यवर्ती सहकारी बँकेच्या निवडणुकीच्या मैदानातून एक अत्यंत मोठी बातमी समोर आली आहे. उमेदवारी अर्जांच्या छाननीदरम्यान निवडणूक निर्णय अधिकाऱ्यांनी घेतलेल्या कठोर निर्णयामुळे दिग्गजांना मोठा धक्का बसला आहे. दाखल झालेल्या एकूण ४०२ अर्जांपैकी तब्बल ९३ अर्ज अवैध ठरवण्यात आले असून, यामध्ये बँकेचे विद्यमान अध्यक्ष संजय पवार, आमदार अनिल पाटील आणि आमदार किशोर पाटील यांचे पुत्र सुमित पाटील यांच्यासह अनेक बड्या नेत्यांचा समावेश आहे. या धक्क्यामुळे सहकार आणि राजकीय वर्तुळात मोठी खळबळ उडाली आहे.

दुसरीकडे, केंद्रीय राज्यमंत्री रक्षा खडसे यांच्या उमेदवारी अर्जावर दाखल करण्यात आलेली हरकत निवडणूक निर्णय अधिकाऱ्यांनी फेटाळून लावली असून, त्यांना मोठा दिलासा मिळाला आहे.

जिल्हा बँकेच्या निवडणुकीसाठी विविध मतदारसंघांतून मोठ्या प्रमाणावर उमेदवारी अर्ज आले होते. छाननी प्रक्रियेनंतर तब्बल ९३ अर्ज बाद झाल्याने अनेक दिग्गजांचे धाबे दणाणले आहेत.

बँकेचे विद्यमान अध्यक्ष संजय पवार आणि आमदार अनिल पाटील हे गेल्या काही काळापासून जिल्हा बँकेच्या कारभारात सक्रिय आहेत. मात्र, छाननीत त्यांचेच अर्ज अवैध ठरल्याने त्यांच्या राजकीय वर्चस्वाला धक्का बसला आहे.

पाचोरा तालुक्यातील प्राथमिक कृषी पतपुरवठा विकास सेवा संस्था मतदारसंघातून सुमित पाटील यांनी अर्ज दाखल केला होता. त्यांच्या पात्रतेवर सतीश परशुराम शिंदे यांनी हरकत घेतली होती. छाननीदरम्यान हा आक्षेप ग्राह्य धरत त्यांचा अर्ज अवैध ठरवण्यात आला.

केंद्रीय राज्यमंत्री रक्षा खडसे या जिल्हा बँकेच्या थकबाकीदार असल्याचा आक्षेप घेत त्यांच्या उमेदवारी अर्जावर हरकत घेण्यात आली होती. यामुळे त्यांच्या अर्जाची वैधता धोक्यात आली होती. मात्र, निवडणूक निर्णय अधिकारी मनोज चौधरी यांनी दोन्ही बाजूंची सुनावणी घेतल्यानंतर रक्षा खडसे यांच्याविरोधातील हरकत अधिकृतपणे फेटाळून लावली. परिणामी, त्यांचा अर्ज कायम राहिला असून निवडणुकीच्या रिंगणात टिकून राहण्याचा त्यांचा मार्ग मोकळा झाला आहे.

छाननीत उमेदवारी अर्ज अवैध ठरलेल्या उमेदवारांना कायदेशीर लढा देण्याची संधी अद्याप उपलब्ध आहे. संबंधित बाद झालेल्या उमेदवारांना निवडणूक निर्णय अधिकाऱ्यांच्या या निर्णयाविरोधात पुढील तीन दिवसांच्या आत नाशिक विभागीय सहनिबंधकांकडे अपील दाखल करता येणार आहे.

आता संजय पवार, आमदार अनिल पाटील आणि सुमित पाटील यांच्यासह इतर बाद झालेले नेते अपीलाचा मार्ग स्वीकारतात का आणि अपीलात त्यांना दिलासा मिळतो का, यावरच त्यांच्या निवडणुकीतील भवितव्य अवलंबून राहणार आहे. या घडामोडींमुळे जळगाव जिल्हा बँकेचे राजकारण चांगलेच तापले आहे.