जळगाव तालुका पोलिसांची कारवाई; सुमारे १ ब्रास वाळू ताब्यात, अज्ञात व्यक्तीविरुद्ध गुन्हा दाखल
पोलिसांनी दिलेल्या माहितीनुसार, ३ ऑगस्ट २०२६ रोजी सकाळी साडेआठ वाजेच्या सुमारास कोल्हे हिल्स परिसरातील सिद्धिविनायक चौकाजवळ एका ट्रॅक्टर-ट्रॉलीमधून गौण खनिज वाळूची वाहतूक होत असल्याचे निदर्शनास आले. संबंधित व्यक्तीकडे वाळू वाहतुकीचा कोणताही शासकीय परवाना नसल्याचे तपासात समोर आले.
कारवाईदरम्यान पोलिसांनी सुमारे १ ब्रास गौण खनिज वाळू, अंदाजे २४ हजार २३० रुपये किमतीची, तसेच स्वराज ७४४ एफईआय कंपनीचा ट्रॅक्टर व त्यास जोडलेली ट्रॉली, असा एकूण ४ लाख २४ हजार २३० रुपयांचा मुद्देमाल जप्त केला.
ट्रॅक्टरचा रंग निळा असून त्याचा नोंदणी क्रमांक व इंजिन-चेसिस क्रमांक पोलिसांनी नोंदवून घेतला आहे.
या प्रकरणी भारतीय न्याय संहिता २०२३ मधील कलम ३०३(२), ३०५(ई) तसेच गौण खनिज विकास व विनियमन अधिनियम कलम २१ आणि महाराष्ट्र जमीन महसूल अधिनियम १९६६ मधील कलम ४८(७)(८) अन्वये गुन्हा दाखल करण्यात आला आहे.
पोलिसांच्या माहितीनुसार, अज्ञात इसमाने कोणतीही शासकीय परवानगी नसताना शासकीय मालमत्तेतील गौण खनिज वाळू चोरी करून विक्रीच्या उद्देशाने ट्रॅक्टर-ट्रॉलीतून वाहतूक केली. त्यामुळे ही कारवाई करण्यात आली.
याप्रकरणी पोलीस नाईक कैलास इंगळे तपास करीत आहेत. गुन्हा जळगाव तालुका पोलीस ठाण्यात गुन्हा क्र. २६६/२०२६ अन्वये दाखल करण्यात आला आहे. या प्रकरणातील आरोपी अद्याप निष्पन्न झालेला नसून त्याचा शोध सुरू आहे.
