यावल तालुक्यातील घटना ; संशयीतासह महिलेच्या नणंदेवरदेखील गुन्हा दाखल
यावल (प्रतिनिधी) : तालुक्यातील एका शेत शिवारामध्ये ३६ वर्षीय महिला शौचालयात गेली असताना एका संशयित आरोपीने तिला विनयभंग करून केळीच्या शेतात ओढत नेले. तेथे तिच्यावर बलात्कार करून तिचे विवस्त्र फोटो काढून महिलेच्याच नणंदेच्या मदतीने व्हायरल केले. याबाबत फैजपूर पोलीस स्टेशनला गुन्हा दाखल करण्यात आला आहे.
यावल तालुक्यातील एका गावामध्ये ३६ वर्षीय महिला मजुरी करून परिवारासह उदरनिर्वाह करते. ही महिला शुक्रवारी दिनांक २३ ऑगस्ट रोजी संध्याकाळी ५ वाजता एका शेत शिवारामध्ये शौचालयासाठी गेली होती. त्यावेळेला तिथे संशयित आरोपी विनोद दोधू मेढे हा आला. त्याने महिलेचा विनयभंग करून तिला जवळच्या केळीच्या शेतात ओढत नेले. त्या ठिकाणी तिला पूर्ण विवस्त्र करून तिचे फोटो काढून तिच्याकडे शरीर सुखाची मागणी केली. तिने त्याला नकार देताच त्यानी तिच्यावर जबरीने बलात्कार केला व जीवे ठार मारण्याची धमकी दिली.
त्यानंतर संशयित आरोपी विनोद मेढे याने महिलेचे विवस्त्र फोटो महिलेची ननंद हिच्याकडे पाठवले. तिने ते फोटो नातेवाईकांमध्ये व्हायरल केले म्हणून पीडित महिलेच्या फिर्यादीवरून फैजपूर पोलीस स्टेशन येथे गुन्हा दाखल करण्यात आला आहे. तपास पोलीस उपनिरीक्षक मैंनुद्दीन सय्यद करीत आहेत.