जळगाव तालुक्यातील वावडदा रस्त्यावरील घटना
जळगाव (प्रतिनिधी) : तालुक्यातील एका रिसॉर्टवर वॉचमन म्हणून काम करीत असलेल्या वृद्ध इसमाला वावडदे ते जळके रोडवर अज्ञात भरधाव दुचाकीने जोरदार धडक दिली होती. अखेर ८ दिवसांनी मृत्यूशी झुंज देताना उपचारादरम्यान त्यांचा मृत्यू झाल्याची धक्कादायक घटना दि. २६ मार्च रोजी सकाळी ७ वाजेच्या सुमारास घडली आहे. याप्रकरणी एमआयडीसी पोलीस स्टेशनला घटनेची नोंद करण्याचे काम सुरु होते. सदर घटना सीसीटीव्ही कॅमेरात कैद झाली आहे.
भावलाल गुलाब चव्हाण (वय ६०, रा. रामदेववाडी ता. जळगाव) असे मयत इसमाचे नाव आहे. ते गावात पत्नी, मुलगा, सून, २ विवाहित मुलींसह राहत होते. भावलाल हे सुनील यांच्या जळके ते वावडदा रस्त्यामध्ये असलेल्या एका रिसॉर्टवर वॉचमन म्हणून काम करीत होते. मंगळवारी दि. १९ मार्च रोजी ते ड्युटीवर होते. जळके ते वावडदा रस्त्यावर संध्याकाळी ७ वाजेच्या सुमारास मुख्य रस्त्यावर भरधाव वेगाने जाणाऱ्या एका अज्ञात दुचाकीने त्यांना जबर धडक दिली. यात ते गंभीर जखमी झाले.
आजूबाजूच्या ग्रामस्थांनी त्यांना तात्काळ शासकीय वैद्यकीय महाविद्यालय व रुग्णालयात उपचारासाठी दाखल केले. रुग्णालयात अतिदक्षता विभागात त्यांच्यावर उपचार सुरु होते. अखेर ८ दिवसांनी मंगळवारी दि. २६ मार्च रोजी त्यांची उपचारादरम्यान सकाळी प्राणज्योत मालविली. यावेळी कुटुंबीयांनी आक्रोश केला. याप्रकरणी एमआयडीसी पोलीस स्टेशनला घटनेची नोंद करण्याचे काम सुरु होते.
