जळगाव तालुक्यातील शिरसोली येथील घटना
जळगाव (प्रतिनिधी) : कामावरुन घरी परतत असताना रस्ता ओलांडणाऱ्या सुरक्षा रक्षकास भरधाव बसने धडक दिल्यामुळे ते जागीच ठार झाले. हा अपघात शनिवारी रात्री ८ वाजेच्या सुमारास शिरसोली रस्त्यावरील श्रीकृष्णा लॉन समोर झाला. पोलिसांनी बससह चालकाला ताब्यात घेतले असून त्याच्याविरुद्ध गुन्हा दाखल करण्याचे काम सुरु होते.
सदू ओंकार चव्हाण (६५, मूळ रा. आंबेवडगाव, ता. पाचोरा, ह. मु. नेहरुनगर, जळगाव) असे मयताचे नाव आहे. पाचोरा तालुक्यातील आंबेवडगाव येथील सदू चव्हाण हे मेहरुण तलाव परिसरात एका अपार्टमेंटमध्ये सुरक्षा रक्षक म्हणून काम करीत होते. (केसीएन)शनिवारी रात्री ते कामावरुन घरी जात असताना पाचोऱ्याकडे जाणाऱ्या बसने (एमएच २०, बीएल ११९७) त्यांना धडक दिली. यात सदू चव्हाण यांचा जागीच मृत्यू झाला. ही घटना परिसरातील नागरिकांच्या लक्षात येताच त्यांनी घटनास्थळी धाव घेतली.
काही वेळाने चव्हाण यांचा मुलगा आला व ठार झालेले आपले वडील असल्याचे समजले. यावेळी वडीलांचा मृतदेह बघताच त्याने आक्रोश केला. पोलिसांनी घटनास्थळाहून धडक देणारी बससह चालकाला ताब्यात घेतले. (केसीएन)याप्रकरणी रात्री उशिरापर्यंत एमआयडीसी पोलिस ठाण्यात गुन्हा दाखल करण्याचे काम सुरु होते.
पोलिसांनी मृतदेह शासकीय वैद्यकीय महाविद्यालय व रुग्णालयात दाखल केला.
