जळगावात राष्ट्रीय महामार्गावरील संध्याकाळची घटना
जळगाव (प्रतिनिधी) : शहरातील मानराज पार्क जवळ दुचाकीला वाहनाचा कट लागला व खाली पडून ट्रक खाली आल्याने तरुण जागीच ठार झाला. तर त्याचे काका जखमी झाले आहे. हा अपघात सोमवार दि. ४ रोजी सायंकाळी ७ वाजता झाला. अपघातानंतर ट्रकसह चालकाला पोलिसांनी ताब्यात घेतले आहे.
संजोग सुरेश सपकाळे (२०, रा. गाढोदा, ता. जळगाव) असे मयत तरुणाचे नाव आहे. तर नवल बिसन सपकाळे (४७, रा. गाढोदा, ता.जळगाव) असे जखमी काकाचे नाव आहे. नवल सपकाळे यांचा मुलगा जळगाव येथे खासगी रुग्णालयात दाखल असल्याने त्याला डबा देण्यासाठी नवल सपकाळे व त्यांचा पुतण्या संजोग हे दुचाकीने जळगावला येत होते. खोटेनगरकडून शिवकॉलनीकडे येत असताना नवल सपकाळे यांच्या दुचाकीला एका वाहनाने कट मारला. त्यामुळे दुचाकीस्वार काका-पुतणे हे रस्त्यावर कोसळले.
त्यात संजोग हा मागून येणाऱ्या ट्रकच्या चाकाखाली आला व चिरडला गेला. तर त्याचे काका जखमी झाले आहे. अपघातानंतर ट्रक चालक तेथून पसार झाला. घटनेची माहिती मिळताच पोलिस घटनास्थळी पोहचले व तरुणाचा मृतदेह व जखमीला शासकीय वैद्यकीय महाविद्यालय व रुग्णालयात दाखल केले. ट्रकसह चालकाला पोलिसांनी ताब्यात घेतले असून गुन्हा दाखल करण्याचे काम सुरु होते. अपघातात तरुण ठार झाल्याची माहिती मिळताच मयत संजोग याच्या नातेवाईकांनी रुग्णालयात धाव घेतली.
कुटुंबियांनी एकच आक्रोश केला होता. संजोग हा आयटीआयचे शिक्षण घेत असल्याने तो दररोज जळगावला येत होता. मात्र सोमवारी तो परतत असताना काळाने त्याच्यावर झडप घातली. संजोग याच्या पश्चात आई, वडील, मोठा भाऊ असा परिवार आहे.
