बोदवड तालुक्यात राजूर गावातील घटना
बोदवड (प्रतिनिधी) :- मुक्ताईनगर-बोदवड मतदार संघातील अपक्ष उमेदवार विनोद सोनवणे यांचा बोदवड तालुक्यातील राजूर गावात प्रचार रॅली सुरू असतांना कारमधून आलेल्या दोन हल्लेखोरांनी गोळीबार केल्याची खळबळजनक घटना आज मंगळवारी दुपारी घडली आहे. या घटनेमुळे एकच खळबळ उडाली असून बोदवड पोलीस घटनास्थळी पोहोचले आहेत.
बोदवड मुक्ताईनगर विधानसभा मतदारसंघाच्या निवडणूकीत अपक्ष म्हणून विनोद सोनवणे हे निवडणूकीच्या रिंगणात उतरले आहे.(केसीएन)दरम्यान, मंगळवारी ५ नोव्हेंबर रोजी सकाळी त्यांनी आपल्या कार्यकर्त्यांसह बोदवड तालुक्यातील शिरसाळा येथील जागृती मारोती मंदीरात जावून प्रचाराचा नारळ फोडून प्रचाराला सुरूवात केली आहे. त्यानंतर त्यांचा प्रचार दौरा बोदवड तालुक्यात सुरू झाला.
बोदवड तालुक्यातील राजूर गावाजवळ दुपारी ३ वाजेच्या सुमारास विनोद सोनवणे यांची प्रचार रॅली जात असतांना बिना नंबरची मोटारसायकलवरून आलेल्या तीन हल्लेखोरांनी त्यांच्यावर गोळीबार केला. यामध्ये ते थोडक्यात बचावले आहेत. कार्यकर्त्यांमध्ये यावेळी पळापळ झाली. या घटनेमुळे बोदवड तालुक्यात एकच खळबळ उडाली आहे. या गोळीबारमध्ये कुणालाही दुखापत झालेली नाही. बोदवड पोलीस घटनास्थळी पोहोचले असून तपास करीत आहे. सदर सर्व कार्यकर्ते हे बोदवड पोलीस स्टेशनला पोहोचले आहे.
