धावत्या दुचाकीसमोर अचानक कुत्रा आल्याने अपघात
अमळनेर ( प्रतिनिधी ) –रस्त्याने जात असताना दुचाकीसमोर अचानक कुत्रा आल्याने झालेल्या भीषण अपघातात एक ३२ वर्षीय महिलेचा मृत्यू झाल्याची हृदयद्रावक घटना घडली आहे. पूनम पृथ्वीराज पाटील (रा. अंचळवाडी, ता. अमळनेर, जि. जळगाव) असे मृत महिलेचे नाव आहे.
२९ जानेवारी रोजी सायंकाळी ४:३० वाजेच्या सुमारास पृथ्वीराज हिरामण पाटील आणि पूनम पृथ्वीराज पाटील हे दोघे आपल्या ‘होंडा’ कंपनीच्या दुचाकीने (क्रमांक एमएच ५४ ए ४९५७) घरून शेताकडे जात होते. अंचळवाडी ते जवखेडे दरम्यान प्रवासात असताना, त्यांच्या दुचाकीसमोर अचानक एक कुत्रा आडवा आला. कुत्र्याला वाचवण्याच्या प्रयत्नात दुचाकीस्वाराचे नियंत्रण सुटले आणि गाडी रस्त्यावर घसरली.
या अपघातात पूनम पाटील यांच्या डोक्याच्या मागील बाजूस गंभीर दुखापत झाली. त्यांना तातडीने धुळे येथील छत्रपती हॉस्पिटलमध्ये दाखल करण्यात आले होते. मात्र, प्रकृती अधिक खालावल्याने त्यांना पुढील उपचारासाठी हिरे मेडिकल कॉलेज (शासकीय रुग्णालय), धुळे येथे हलवण्यात आले.
३१ जानेवारी रोजी दुपारी ४:४० वाजता त्यांना हिरे मेडिकल कॉलेजमध्ये दाखल करण्यात आले. तिथे उपचार सुरू असतानाच, १ फेब्रुवारी २०२६ रोजी दुपारी १:३० वाजेच्या सुमारास डॉ. विश्वनाथ कुंभार यांनी त्यांना मृत घोषित केले.या घटनेबाबत धुळे शहर पोलीस ठाण्यात अकस्मात मृत्यूची नोंद करण्यात आली आहे. घटनेची माहिती मिळताच अमळनेर पोलीस ठाण्याचे पोलीस हेड कॉन्स्टेबल काशिनाथ पाटील अधिक तपास करत आहेत. या घटनेमुळे अंचळवाडी परिसरात हळहळ व्यक्त केली जात आहे.
