अमळनेर तालुक्यातील घटना
जळगाव (प्रतिनिधी) : दुचाकी रस्त्याच्या कडेला लावून रस्ता ओलांडत असताना धरणगावकडून भरधाव वेगातील वाहनाने धडक दिली. यात पादचाऱ्याचा जागीच मृत्यू झाला. ही घटना शनिवार, ३१ रोजी मध्यरात्रीनंतर कुन्हे खुर्द शिवारात धरणगाव अमळनेर रोडवर बॉबी हॉटेलसमोर घडली. अमळनेर पोलीस स्टेशनला घटनेची नोंद करण्यात आली आहे.
भटु दगा चव्हाण (रा. कर्ले, ता. शिंदखेडा) असे मृताचे नाव आहे. भटू चव्हाण हे धरणगाव-अमळनेर मार्गावर दुचाकी क्रमांक जी.जे. ०५ सी.सी. ४७१४ ने जात होते. दरम्यान रोडवर बॉबी हॉटेल त्यांनी रस्त्याच्याकडेला दुचाकी थांबविली. त्यानंतर ते हा रस्ता ओलांडत असताना धरणगावकडून भरधाव वाहनाने त्यांना धडक दिली. डोक्याला गंभीर दुखापत होवून त्यांचा मृत्यू झाला. अपघात झाल्यानंतर ताब्यातील वाहनसह संशयित चालक सुसाट वेगाने पसार झाला.
कुऱ्हे खुर्दचे पोलीस पाटील राकेश पाटील यांनी माहिती अमळनेर पोलिसांना दिली. पोनि विकास देवरे यांच्यासह कर्मचाऱ्यांनी घटनास्थळी धाव घेतली. तपास पोउपनि रामकृष्ण कुमावत हे करीत आहेत. पोलिसांनी घटनेची माहिती तत्काळ शिंदखेडा पोलिसांना दिली.
