ट्रॅक्टर ट्रॉली विहिरीत कोसळली; दोन चिमुकल्या बेपत्ता
साक्री तालुक्यातील गणेशपूर येथील घटना
धुळे प्रतिनिधी साक्री तालुक्यातील गणेशपूर येथे रविवारी दुपारी कांदा भरलेली ट्रॅक्टर ट्रॉली विहिरीत कोसळून तीन चिमुकल्या पाण्यात पडल्याची धक्कादायक घटना घडली. यापैकी एका बालिकेला गावकऱ्यांनी बचावले असून दोन बालिका अद्याप बेपत्ता आहेत.
कांदा चाळीत ट्रॉलीमध्ये माल भरण्याचे काम सुरू असताना मजुरांची मुले ट्रॅक्टरवर खेळत होती. दरम्यान, ट्रॅक्टर अचानक सुरू झाला आणि ट्रॉलीसह अंदाजे ६० फूट खोल, पाण्याने भरलेल्या विहिरीत कोसळला. गावकऱ्यांनी तातडीने मदतकार्य सुरू करून परी संदीप गायकवाड (वय २) हिला बाहेर काढले.
मात्र खुशी दाजू ठाकरे (३) आणि ऋतिका संदीप गायकवाड (३) या दोन बालिका पाण्यात बेपत्ता झाल्या असून त्यांच्या शोधासाठी पंपाद्वारे विहिरीतील पाणी उपसण्याचे काम उशिरापर्यंत सुरू होते. मदतकार्याकरिता जेसीबी मागविण्यात आली आहे.
घटनेची माहिती मिळताच साक्री पोलीस ठाण्याचे निरीक्षक दीपक वळवी व पथक घटनास्थळी दाखल झाले. गावकऱ्यांच्या मदतीने बचाव व शोधकार्य युद्धपातळीवर सुरू असून परिसरात हळहळ व्यक्त होत आहे.
