संतप्त जमावाने पेटवला ट्रक, ममुराबाद रस्त्यावर तणाव
जळगाव (प्रतिनिधी) : शहरानजीकच्या ममुराबाद रस्त्यावरील प्रजापती नगराजवळ भरधाव ट्रकने ९ वर्षाच्या चिमुकल्याला चिरडल्याची अत्यंत धक्कादायक आणि दुर्दैवी घटना घडली आहे. या भीषण अपघातात बालकाचा जागीच मृत्यू झाला असून, घटनेनंतर संतप्त झालेल्या जमावाने अपघातग्रस्त ट्रक थेट पेटवून दिला.
मिळालेल्या माहितीनुसार, शनिपेठ परिसरातील गवळी वाड्यात राहणारा प्रबल राजू गवळी (वय ९) हा चिमुकला कावड यात्रेदरम्यान ममुराबाद रस्त्यावरील देवीच्या मंदिरात दर्शनासाठी गेला होता. दर्शन घेऊन मंदिराबाहेर पडत असतानाच भरधाव वेगाने येणाऱ्या ट्रकने त्याला जोरदार धडक दिली. ट्रकच्या चाकाखाली आल्याने प्रबलचा जागीच करुण अंत झाला. अपघात घडल्यानंतर संतप्त जमावाने रस्त्यावर गोंधळ घालत थेट ट्रकला आग लावली. तसेच, घटनास्थळी पोहोचलेल्या अग्निशमन दलाच्या गाडीला पेटलेला ट्रक विझवण्यापासून रोखून धरले.अपघातात ट्रक चालकही किरकोळ जखमी झाला असून, पोलिसांनी त्याला तातडीने रुग्णालयात हलवले आहे.
दरम्यान, संतप्त नागरिकांनी मृत बालकाचा मृतदेह रस्त्यावर ठेवून संबंधित ट्रक चालकाला तात्काळ घटनास्थळी आणून आमच्या ताब्यात द्या, अशी आक्रमक मागणी लावून धरली.
घटनेची माहिती मिळताच जळगाव तालुका पोलीस स्टेशनच्या पथकासह वरिष्ठ पोलीस अधिकाऱ्यांनी घटनास्थळी धाव घेतली. परिस्थिती अत्यंत तणावपूर्ण बनल्याने परिसरात मोठा पोलीस बंदोबस्त तैनात करण्यात आला आहे.
पोलिसांनी संतप्त जमावाची समजूत काढली. दरम्यान, चिमुकल्या प्रबलचा मृतदेह शासकीय वैद्यकीय महाविद्यालय व रुग्णालयात (जीएमसी) आणला असता, वैद्यकीय अधिकाऱ्यांनी तपासणीअंती त्याला मृत घोषित केले. यावेळी त्याच्या नातेवाईकांनी केलेला हृदयद्रावक आक्रोश उपस्थितांचे मन हेलावून टाकणारा होता. याप्रकरणी जळगाव तालुका पोलीस ठाण्यात गुन्हा दाखल करण्याची प्रक्रिया सुरू आहे. प्रबल गवळी याच्या पश्चात आई-वडील असा परिवार असून वडील मजुरी करून परिवाराचा उदरनिर्वाह करीत होते.
