जळगाव शहरातील घटना
जळगाव (प्रतिनिधी) : शहरातील रामानंदनगर परिसरात राहणाऱ्या एका अल्पवयीन तरुणीला लग्नाचे आमिष दाखवून आरएल चौफुली जवळील एका हॉटेलमध्ये नेऊन तिच्यावर तरुणाकडून अत्याचार करण्याचा धक्कादायक प्रकार समोर आला आहे. या संदर्भात मंगळवारी दि. ४ फेब्रुवारी रोजी सायंकाळी ४.३० वाजता एमआयडीसी पोलिस ठाण्यात २ जणांविरोधात गुन्हा दाखल करण्यात आला आहे.
पीडित तरुणीची ओळख ३ नोव्हेंबर २०२३ रोजी रवींद्र प्रभाकर मराठे (रा. सुप्रीम कॉलनी, जळगाव) याच्याशी झाली. रवींद्रने पीडित तरुणीला लग्नाचे आश्वासन देऊन तिचा विश्वास संपादन केला आणि नंतर तिला जळगाव शहरातील आरएल चौफुली जवळील एका हॉटेलमध्ये नेऊन तिच्यावर वेळोवेळी अत्याचार केला. या प्रकार दि. ३१ ऑगस्ट २०२४ पर्यंत सुरु होता. त्याने वेळोवेळी तिच्यावर लैंगिक अत्याचार केले.
या अत्याचाराच्या कृत्यांबाबत पीडित तरुणीने एमआयडीसी पोलिस ठाण्यात तक्रार दिली आहे. तिच्या तक्रारीनुसार, रवींद्र प्रभाकर मराठे याच्याव्यतिरिक्त मुलगी अल्पवयीन असल्याचे माहीत असतानाही हॉटेल उपलब्ध करून देणारा राज सुरेश तायडे (रा. जळगाव) याच्या विरोधातही गुन्हा दाखल करण्यात आला आहे. एका संशयित आरोपीला अटक करण्यात आलेली आहे. पोलीस उपविभागीय अधिकारी संदीप गावित यांचा मार्गदर्शनाखाली या प्रकरणाचा तपास सुरू आहे.
