जळगाव शहरातील निसर्ग कॉलनीतील घटना
जळगाव (प्रतिनिधी) :- जळगाव शहरासह जिल्ह्यात आत्महत्येचे सत्र सुरूच असून गुरुवारी १९ ऑक्टोबर रोजी एका तरुणाने दुपारी ४ वाजेच्या सुमारास छताला ओढणीने गळफास लावून आत्महत्या केल्याची घटना उघडकीस आली आहे. याप्रकरणी तालुका पोलीस स्टेशनमध्ये अकस्मात मृत्यूची नोंद करण्याचे काम सुरु होते.
दिनेश मधुकर शिरसाठ (वय ३६, रा. निसर्ग कॉलनी, सावखेडा शिवार, वाघ नगर परिसर) असे मयत तरुणाचे नाव आहे. तो आई, पत्नीसह राहत होता. दिनेश डॉमिनोज पिझ्झा येथे काम करीत होता. तर त्याची पत्नी हि एका ब्युटी पार्लरमध्ये जॉब करीत होती. गुरुवारी १९ रोजी दुपारी तो घरी आला. तेव्हा जेवण करून तो वरच्या खोलीत गेला. त्यानंतर तो खाली उतरला नाही. त्यामुळे कुटुंबीयांनी दिनेशला वरती जाऊन पाहिले असता, त्याचा गळफास घेतलेल्या अवस्थेत मृतदेह दिसून आला. यावेळी कुटुंबीयांनी एकच आक्रोश केला.
नातेवाईकांनी त्याला शासकीय वैद्यकीय महाविद्यालय व रुग्णालयात आणले असता तेथे वैद्यकीय अधिकारी डॉ. सचिन पाटील यांनी त्यास तपासणीअंती मयत घोषित केले. तालुका पोलिसांना घटनेची माहिती मिळताच त्यांनी घटनास्थळी धाव घेतली. दरम्यान, दिनेशच्या आयुष्यात सर्व सुरळीत होते, मात्र त्याने आत्महत्या का केली याबाबत कुटुंबियांनाही धक्का बसल्याचे नातेवाईकांनी सांगितले. तालुका पोलीस स्टेशनला अकस्मात मृत्यूची नोंद करण्याचे काम सुरु होते. जिल्ह्यात आत्महत्यांचे सत्र सुरूच असून यामुळे समाजमन चिंतीत झाले आहे.
